Innovacion tecnologico ta e motor di prosperidad riba termino largo. En berdad nos tin retonan structural profundo, pero na mes momento tin oportunidadnan inmenso pa usa innovacion tecnologico, hunto cu maneho bon pensa pa transforma calidad di bida pa full pueblo di Aruba.

Pa hopi tin di e conceptonan por zona “radical”, pero mester enfatisa cu sin accion radical, e alternativa di “business as usual” lo crea problemanan masha grandi riba un termino mas strategico. Preguntanan manera crisis di costo di bida, crisis di fondonan social, y e ola di automatisacion binidero, mester wordo enfrenta awo, si nos ta desea di no sufri consecuencianan socio-economico severo. E situacion critico cu mi ta describi ta rekeri cu mester por hiba dialogo transparente y constructivo con pa mustra e sociedad y e ciudadano riba e diferente scenarionan nos dilanti. Ami sigur lo kier contribui na esaki.

Automatisa salubridad

Pa hopi edicion di nos columna semanal a papia di varios inversion cu por haci pa baha gasto di cuido/AZV y na mes momento hisa calidad di bida pa tur esnan usando e sistema di salubridad local. Pensa inteligencia artificial pa radiologia, patologia, recepcionista medico, e-health y monitor continuo di pacient cu riesgo halto pa eventonan negativo manera stroke, atake di curazon of problema di nier. Tambe un health-scan completo di henter Aruba su poblacion adulto usando tecnologianan sofistica di ‘predictive analytics’ pa asina midi cua persona tin riesgo di salud di mas halto pa asina stratifica den un manera riguroso ken mester haya preferencia pa servicionan di salubridad. Tur esaki por facilmente wordo financia cu “surplusnan” di AZV, y no lo solamente baha gasto manera strategico, pero lo hisa calidad di bida tambe, cual lo traduci su mes den mas entrada di belasting, den un manera duradero.

Energia solar cu bateria

Un otro innovacion cu por tin efectonan profundo pa ambos individuo y pa henter pais ta esun di energia solar combina cu sistema di bateria. Aruba ta hopi dependiente di importacion di heavy crude oil pa su produccion di energia. Pero na mesun momento nos ta bendiciona cu un potencial enorme di Solo. Aruba lo por transiciona pa tur cas haya nan mesun sistema di panel solar y bateria. Esaki lo baha gastonan di energia den un manera hopi duradero y na mesun momento yuda e pais cu su balansa di pago/current account, cual ta algo sumamente importante den plazo strategico pa nos pais.

Wealth tax & entrada universal

En fin, tambe mester wak e parti socio-economico di Aruba, unda na mesun momento un gran mayoria di e pais ta biba bao e bestaansminimuum, mientras cu menos di 20 kilometer leu tin casnan y condominio cu ta bal 3 miyon florin of mas. Tambe e yegada di inteligencia artificial & robotica lo haci e division aki mas grandi ainda den plazo largo. Den e contexto aki mester pensa riba redistrubucion di rikesa, esta den forma di vermogensbelasting y den mi opinion formanan di entrada universal. Net e delaster siman di 2025, a sali un estudio grandi di Suecia, unda un experimento cu 1.400 euro di entrada universal tabatin efectonan sumamente positivo, manera menos criminalidad, menos uso di Eerste Hulp, y un aumento visibel den salud mental. Entrada Universal basa riba vermogensbelasting ta un inversion cu lo paga pa su mes hopi facil den plazo strategico.

Weganan di kleuterschool mester stop

Mas importante cu tur, mester bin un revitalisacion cerca nos ultra-kader con critico e situacion en berdad ta y cu esaki lo cuminsa rekeri accion cu por ta politicamente dificil. Den esaki mester cuminsa un dialogo abierto y sincero cu full pueblo. Na luga cu kico ta pasa awo, cu e momento ami saca un articulo critico tocante e varios crisis riba nos Isla, e siguiente dia nos ultra-kader ta purba convence nos cu Aruba ta Disney World. Nos mester un cierto madurez pa finalmente cuminsa enfrenta e problemanan structural cu a papia varios aña riba dje. Mi ta spera cu aña 2026, por ta uno di madurez, dialogo y union cerca tur stakeholders y cu hunto usando innovacion tecnologico y politica innovativo cu lo cuminsa crea solucionnan pa Aruba.