(AFP) — Presidente Donald Trump a bisa diabierna cu Merca ta “prepara y arma” pa responde si Iran mata manifestantenan, despues cu protesta riba costo di bida den e pais a bira mortal.
Manifestantenan y forsanan di seguridad a choca den varios ciudad Irani diamars, cu seis persona reporta morto den e prome mortonan desde cu e disturbionan a intensifica.
Doñonan di tienda den e capital Tehran a welga diadomingo pa motibo di prijsnan halto y paralisacion economico, accionnan cu despues a extende na otro parti di e pais.
Trump a bisa riba su plataforma Truth Social cu “si Iran dispara y mata manifestantenan pacifico, di cual ta nan custumbra, Merca lo bin na nan rescate.”
“Nos ta prepara y arma, y cla pa bay,” e lider Republicano a agrega.
Agencia di noticia Irani, Fars, a reporta diamars cu dos persona a ser mata den un enfrentamento entre forsanan di seguridad y manifestantenan den ciudad Lordegan, den e provincia Chaharmahal y Bakhtiari, y tres den Azna, den e provincia bisindario Lorestan.
Television estatal a reporta mas tempran cu un miembro di forsanan di seguridad di Iran a ser mata durante protesta nocturno den ciudad occidental Kouhdasht.
E manifestacionnan ta mas chikito cu e ultimo incidente grandi na 2022, cual a ser desencadena door di e morto di Mahsa Amini den custodia, kende a ser aresta pa supuestamente viola e codigo di vestuario pa hende muher na Iran.
Su morto a provoca un ola nacional di rabia cu a laga varios centenares di persona morto, incluyendo decenas miembro di forsanan di seguridad.
