(AFP) – Un total di 128 reportero a ser asesina den 2025, cu mas di mita di nan den Medio Oriente, International Federation of Journalists (IFJ) a bisa diahuebs.
E cantidad aki, un aumento compara cu aña 2024, “no ta djis un estadistica, e ta un alerta cora global pa nos coleganan,” IFJ su secretario general Anthony Bellanger a conta AFP.
E grupo di prensa a expresa alarme particular a causa di e situacion den e teritorionan Palestino, unda el a mira 56 profesional di media asesina den 2025 mientras Israel su guera cu Hamas tabata cana na Gaza. “Nunca nos a mira nada manera esaki: asina hopi morto den asina tiki tempo, den un area asina chikito,” Bellanger a bisa. Reporteronan tambe a keda asesina na Yemen, Ucrania, Sudan, Peru, India y otro paisnan.
Bellanger a condena loke e ta yama “impunidad” pa esnan tras di e atakenan aki. “Sin husticia, e ta permiti e asesinonan di reporteronan sigui padilanti,” el a adverti.
Mientrastanto, IFJ a bisa cu den henter mundo, 533 reportero ta den prison – un cifra cu a mas di dobla den ultimo mita decada.
China un biaha mas ta den posicion top riba e lista como esun cu mas ta encarcela reportero cu 143 deteni, incluyendo na Hong Kong, unda autoridadnan a ricibi critica di nacionnan Occidental pa impone leynan di seguridad nacional cu ta silencia oposicion.
IFJ su cifranan pa e cantidad di reportero asesina ta tipicamente hopi mas halto cu esun di Reporters Without Borders, a causa di diferente metodo usa. E aña aki su cifra di IFJ tambe a inclui 9 morto accidental.
Reporters Without Borders a bisa cu 67 reportero a keda asesina den e curso di nan trabao e aña aki, mientras cu UNESCO ta pone e cifra na 93.
