70 aña di Statuut: E triki di Hulanda den proceso di decolonisacion

Un tempo pasa a tuma luga presentacion di e obra mas recien di mr. Dr. Rene Vicente Rosalia, ken ta un docente, hurista, antropologo cultural, etnomusicologo y investigador di historia y cultura di Corsou, describi como un “luchado pa un yiu di Corsou nobo den un Corsou independiente.”

A skirbi e obra en conexion cu 70 aña di Statuut y segun un descripcion di esaki, e publicacion ta trata e deficit democratico cu Corsou ta experiencia den e relacion cu Hulanda como pais ‘autonomo’ den Reino Hulandes. Esaki ta algo relevante pa Aruba, pa motibo cu nos isla tambe ta un pais ‘autonomo’ den Reino Hulandes, sinembargo te ainda ta depende riba Hulanda pa varios aspecto y su democracia ta uno cu no semper ta sinti di manera completo.

Durante e presentacion, mr. Dr. Rosalia a comparti cu Hulanda ta violando articulo 73 y 103 di Carta Magno. Hulanda a firma e Carta Magno pero nunca a acepta elimina colonialismo. Al contrario, a traha strategia pa scapa di e tratado aki, segun Rosalia.

Ya caba a cuminsa explora con Statuut a keda forma, cua ta su contenido y con esaki ta ilustra politica Hulandes cu ta hunga un rol den colonialismo y con esaki ta fomenta su continuacion pa tur e islanan den Reino. Den e articulo aki, nos lo cuminsa papia un poco mas tocante loke Mr. Dr. Rene Vicente Rosalia ta describi como “e triki Hulandes.”

Den e obra literario, ta splica cu dilanti Nacionnan Uni (UN), Hulanda a presenta Koninkrijk der Nederlanden como un orden huridico nobo pero en realidad Koninkrijk der Nederlanden tabata e pais Hulanda – cual ta e colonisador – hunto cu su colonianan Surinam, Aruba, Boneiro, Saba, Sint Eustatius, Sint Maarten y Corsou. Dia 15 di december 1955, a yega resolucion nr. 945, unda Hulanda a gaña Nacionnan Uni pa medio di argumenta cu Antia Hulandes y Surinam ta teritorio unda tin gobernacion propio, comparable na un federacion. Mr. Dr. Rosalia ta detaya cu Hulanda a entrega Statuut na Nacionnan Uni pa “logra scapa di e obligacion (Art. 73 Carta Magno).” E articulo aki, ta trata e obligacion di reporta cada aña tocante e desaroyonan y decolonisacion di Antia Hulandes y Surinam.

Den añanan 1946, Antia Hulandes y Surinam tabata entre e 72 teritorio unda no tabatin gobernacion propio. Nacionnan Uni tabatin un lucha andando e tempo aki cu e meta di completamente eradica colonisacion, y Hulanda como un colonisador di varios pais, mester a busca manera di modifica e status di su colonianan. Aki Mr. Dr. Vicente ta splica cu “el a institui Interimregeling y despues Statuut, caminda e ta duna Antia cu Surinam un poco mas di autonomia.” Esaki ta un di e puntonan unda e triki ta bin. Danki na esaki, tanto Antia Hulandes como Surinam no ta forma parti di e lista di paisnan cu no tin gobernacion propio mas y e tiki mas di autonomia aki a yuda pa Hulanda por scapa di cumpli cu e obligacion anteriormente nombra, cu Nacionnan Uni te hasta poniendo un nota; “Netherlands Antilles granted more autonomy.”

Algo interesante cu Mr. Dr. Rosalia ta trece dilanti, ta cu Antia Hulandes y Surinam no ta presente tampoco riba e lista unda ta nombra e paisnan cu si tin gobernacion propio, es decir, nan no ta presente riba ningun lista. “Remarcabel ta cu no ta existi niun resolucion y niun decision di Asamblea General di Nacionnan Uni unda ta decreta cu a baha Surinam y Antia Hulandes for di e lista di paisnan cu no tin gobernacion propio.”

Tambe ta interesante cu aunke Hulanda a logra via “manipulacion y lobby” logra yega na un exoneracion di reporta na Secretario General, esaki no ta hustifica cu e pais a keda sin cumpli cu e otro exigencianan den articulo 73 di e Carta Magno.

Entre tur esaki, tabatin pais cu no tabata di acuerdo, entre otro detaye mas concreto, Mr. Dr. Vicente ta conta cu India y Uruguay no tabata di acuerdo cu Hulanda, cu Uruguay critico tocante e resolucion 945 y treciendo dilanti cu Antia Hulandes y Surinam no tin gobernacion propio. Na su turno, India a declara cu e resolucion ta den violacion di articulo 73 di e Carta Magno, ademas, a trece dilanti un amienda unda India ta declara cu e proceso pa decolonisa Antia Hulandes y Surinam no ta den cumplimento cu e 12 exigencianan stipula den resolucion 742 di Asamblea General.

E 12 exigencia aki, ta entre otro e opinion di e poblacion, libertad di escogencia, consideracionnan geografico, consideracionnan etnico y cultural, avance politico, consideracionnan constitucional, representacion legislativo,participacion di e poblacion, ciudadania, oficialnan gubernamental, derechonan local y status, oficialnan local, legislacion interno y hurisdiccion economico, social y local.

E Carta Magno di Nacionnan Uni ta contene 11 articulo unda ta papia di e status di paisnan cu no tin gobernacion propio y cu ta cay bao di e dominio y hurisdiccion di un pais cu ta miembro di Nacionnan Uni cu a colonisa nan, den e caso aki, e ta papia tocante e status di e paisnan cu ta bao dominio y hurisdiccion di Hulanda.

Esaki ta importante pa motibo cu aki nos lo por siña mas tocante e status di paisnan manera nos, unda gobernacion propio ta presente pero na un manera sumamente controla y mas importante, na un manera unda aunke nos ta bao e impresion cu gobernacion ta den nos man, e realidad ta otro. Durante e presentacion di e obra literario, Mr. Dr. Rosalia a splica cu “Art. 2 ta bisa cu Rey ta goberna tur pais y Reino … E ta hefe di Reino y hefe di cada pais. Kiermen na Aruba aki, cabes di gobierno na Aruba no ta Eman, cabes di gobierno di Aruba ta Rey Willem-Alexander.”

Articulo 73 y 74 di e Carta Magno ta resalta pa motibo cu e base ta cu e paisnan cu ta miembro di Nacionnan Uni cu tin colonia mester reconoce y acepta e principio fundamental cu interes di e habitantenan di e paisnan aki “na prome luga. E paisnan colonisador mester acepta e encargo y obligacion sagrado di promove intensivamente dentro di e sistema di paz y seguridad internacional, bienestar di e habitantenan den nan colonianan.”

Mr. Dr. Rene Vicente Rosalia ta sigui splica cu e Carta Magno ta prescribi cu paisnan cu tin un teritorio bao di nan cu no tin gobernacion propio, ta mara na e obligacionnan ancra den articulo 73 di A te cu E. “Basicamente, Carta Magno capitulo 11 ta diseña pa tur pais miembro di Nacionnan Uni cu a firma e tratado, yuda e pais cu ta cay bao di dje alcansa gobernacion propio. Cu otro palabra yuda nan cumpli cu e derecho sagrado di autodeterminacion.

Den proximo edicion, nos lo trata mas den detaye Articulo 73 y e diferente puntonan cu esaki ta trece dilanti y hunto desaroya un comprension mas profundo di nos Statuut.