(AFP) —Forsanan militar di Merca y aliadonan a haci un atake “di gran escala” contra e grupo yihadista Estado Islamico na Siria diasabra, segun e ehercito Mericano a confirma, como e respuesta mas recien na un atake luna pasa cu a mata tres ciudadano Mericano.
US Central Command (CENTCOM), cual ta supervisa e forsa militar di Merca den e region, a bisa cu hopi atake tabata “dirigi riba ISIS den henter Siria”.
E publicacion di CENTCOM na X no a duna detaye specifico tocante unda e atakenan a tuma luga.
E Forsa Aereo di Jordan tambe a haci atakenan dirigi contra Estado Islamico como parti di e operacion, segun e ehercito di e pais a informa diamars.
Den un declaracion, nan a bisa cu a ataca “varios blanco…den diferente area den teritorio Sirio”.
Dos soldad y un interprete civil Mericano a muri dia 13 di december despues cu un homber arma—ken Washington a describi como militante di IS—a lansa un atake contra nan na Palmyra, un sitio cu ruinanan antiguo reconoci pa UNESCO y cu anteriormente tabata bao control di e grupo yihadista.
Mas despues, e ministerio di Asunto Interior di Siria a declara cu e atacador tabata un miembro di e forsa di seguridad cu tabata riba lista pa ser despedi pa extremismo.
Finalmente, e yihadistanan a ser derota pa forsanan local na tera cu apoyo di atakenan aereo internacional y otro formanan di asistencia, pero IS ainda tin presencia den Siria, specialmente den e desierto grandi di e pais.
Presidente di Merca Donald Trump tabata conoci pa su skepticismo prolonga tocante presencia di Washington den Siria, dunando orden pa e retiro di tropanan durante su prome termino, pero finalmente el a laga forsanan Mericano den e pais.
E Pentagono a anuncia na april cu Merca lo reduci e cantidad di personal militar na Siria na mita den e proximo luna, mientras enviado special di Merca pa Siria, Tom Barack, a bisa na juni cu Washington lo eventualmente reduci su base militar den e pais pa un so.
