Durante un bishita na e stacion di polis en cuestion, e mandatario encarga cu Husticia Arthur Dowers, a tuma nota cu e edificio y tereno alrededor di e stacion tin un falta severo di mantenemento. Segun e mandatario, e condicionnan aki ta crea un ambiente di trabao cu no ta higienico pa e personal.
Dowers a haci e bishita dia 8 di januari cu atencion di Insector Raquel Ras. Durante e bishita aki, el a papia cu e empleadonan di departamento di investigacion criminal y unidad di narcotico, entre otro, ademas di inspecciona unda e celnan ta. E minister pa papia brevemente cu algun detenido tambe cu tabata pafo durante nan ora di sali.
Segun informacionnan den medio local, loke tabata particularmente impactante ta e cantidad di vehiculo, bicicleta, entre otro, cu confisca cu ta warda na e sitio. Segun e mandatario, esaki ta un factor cu ta contribui na contaminacion y ta crea un ambiente cu no ta sanitario y no ta safe pa e oficialnan cu ta traha aki diariamente.
E minister a expresa tambe cu e ta desapunta cu e estado den cual e stacion di polis ta y a expresa cu ta inaceptable pa un edificio publico cu un funcion social asina importante ta victima di negligencia di tal grado.
Segun su persona, ambos e edificio y e tereno ta den mal condicion, cu crecemento di yerba y e presencia di materialnan innecesario.
E situacion aki no ta unico di e stacion di polis na Shaba, sino un moda cu ta mira na varios edificio rond di Aruba. Anteriormente caba, e mesun mandatario a bishita edificio cu tabata bao uso di ministerio di Husticia y awo ta bandona, cu ta completamente tuma over pa adictonan ambulante y ta yen di deterioro y contaminacion. Di mesun manera e edificio unda departamento di rijbewijs ta opera, cu tambe ta den condicionnan precario y no ta apto como un sitio unda empleadonan ta traha diariamente.
Ademas di reconocimento y bishita, e situacion cu e edificionan aki ta enfrenta mester di cambio concreto y solucion inmediato.
