Famia di turista Mericano cu a ser haya morto den camber di hotel aki na Aruba a emiti un declaracion tocante e situacion lamentable mediante un comunicado den medionan Mericano. E incidente tambe a resulta den morto di su casa y awor ta bao di investigacion di autoridadnan local.
Diadomingo mainta polis a presenta na St. Regis Hotel despues di informe cu un homber a cay for di balcon. Ora cu oficialnan a yega alrededor di 8:44 a.m., nan a haya un homber di nacionalidad Mericano di 45 aña cu no tabata reacciona. Autoridadnan despues a identifica e victima como Boris Jozic y a ser pronuncia morto na e sitio.
Mientras tabata investiga e caida, polis y personal di hotel a drenta e camber di hotel di e pareha, caminda nan a descubri e curpa di e casa di Jozic, ken autoridadnan despues a identifica como Cristina Jozic. Autoridadnan a bisa cu e situacion tabata “inusual y tragico.”
Den e comunicado emiti pa e famia, nan a recorda C. Jozic como un hende muher amoroso y dedica. “Cristina tabata mama di cinco yiu, wela, yiu muhe, ruman muhe, tanta, y un miembro stima di su comunidad,” e famia a bisa. Nan a describie como un hende cu tabata cuida su famia profundamente y a laga un impacto positivo riba tur hende cu el a topa.
E pareha tabata di bishita na Aruba di vakantie. Publicacionnan riba rednan social comparti na comienso di aña ta mustra nan ta disfruta di nan estadia na e isla.
Den e area di Chicago, miembronan di comunidad a comparti nan condolencia. Flor y potretnan a ser poni pafo di Steel Fitness Club na Morton Grove, e gym propiedad di e pareha, caminda a lanta memorialnan na nan honor.
E famia a gradici e pueblo pa e sosten y a pidi pa privacidad mientras nan ta di luto.
Polis di Aruba ta bisa cu e investigacion ta andando y no a divulga mas detaye.
