Den fin di siman a tuma luga eleccion di Reina di Aruba su carnaval, y manera ya ta conoci, pastoor Jairo Maduro tabata presente como Prins di Carnaval. El a yuda saca e di 30 Señora Carnaval di Aruba, locual a trece critica di personanan cu no ta di acuerdo cu e pastoor su participacion den carnaval. A traves di un publicacion riba su pagina di Facebook, Pastoor Jairo a reacciona riba e criticanan aki y a laga un mensahe bon cla pa pueblo di Aruba.

No ta prome biaha cu Pastoor Jairo ta haya critica pa participa den eventonan di Carnaval. Den aña 2024, Pastoor Jairo a ser critica pa participa den e festival di Caiso y Soca Monarch. Den un entrevista cu Bon Dia Aruba e tempo ey, el a enfatisa cu semper el a gusta canta y cu su participacion den e festival di Caiso y Soca Monarch 2024 no a afecta su conviccionnan y su relacion cu Dios.

“Mi ta hopi feliz como sacerdote. Eynan mi ta sinti mi realisa, eynan mi ta sinti den mi curason cu esey ta mi luga cu Dios a pone mi; y toch e kier pa mi desempeña den tur mi talentonan cu e mes a duna mi, como forma di trece hende hunto. Nunca den mi curason tin mundanidad ora cu mi ta participa den e cosnan aki. Mi ta un hende cu ta resa hopi, mi ta haci misa tur dia y mi relacion cu Dios semper ta uno cu ta hopi stabiel,” el a enfatisa e tempo ey.

Awor, un biaha mes pastoor Jairo ta reacciona riba criticanan. “Kizas bo no ta di acuerdo cu mi. Kizas bo ta pensa cu mi a perde rumbo di mi bida como Sacerdote of kizas mas cos tin den bo cabes! Ora bo ta pensa esey, ta esaki mi por bisa bo pa awor. Siendo un Sacerdote pa 21 aña caba y hopi feliz di mi vocacion, mi ta sinti cu mi mester ta den pueblo, den su celebracionnan y tambe den su lucha y dolornan. Mi ta gradici Dios cu mi por haci esaki tambe! Pasobra realmente ta hopi cos mi sa haci y algun di nan ta tras di cortina,” el a indica.

El a enfatisa cu ta den pueblo kiermen duna e mihor di dje y sa kico ta biba den cada curason. El a señala cu el a yega di bisti diferente trahe den su bida, pero e bisti cu ta marca su funcion ta un Sotana preto cual tambe tin biaha, el a remarca, no ta ser aprecia, pero cu ta laga tur hende sa cu e ta un homber di Dios, manifestando cercania, compasion y alegria na tur momento.

Pastoor Jairo a subraya cu e no ta un persona mundano, y cu a pesar di e husgamento cu e sinti, e ta sinti amor tambe na mesun momento, y den tur esaki ta sigui realisa cu mesun amor su trabou como sacerdote.

“Den e dianan aki lo bo mira mi den ambiente di musica, alegria, pero mi kier bisa bo cu tambe mi ta cana den gang di Hospital, mi ta bishita Hospice y casnan di grandinan, tin biaha den oranan di marduga pa tene man di esnan cu ta saliendo di e bida aki y pa duna consuelo pa esnan cu ta keda! Tur dia mi ta para tras di un mesa grandi pa celebra Hesus bibo den Eucaristia cual ta mi mayor forsa! Mi no a perde rumbo simplemente mi ta gusta ta den pueblo di hopi forma! Dios bendiciona boso tur y pasa un dushi Carnaval cuidando curpa y alma! Atentamente Pastoor Jairo Maduro “Prins Lanta Para,” el a finalisa su publicacion.