(AFP) – Benta di casnan cu a ser usa anteriormente na Merca a subi mas cu loke tabata anticipa na luna di december, y a yega na e nivel mas halto den casi tres aña, impulsa pa tarifa di hipoteca mas abao, segun datonan di industria publica diaranson.
Benta di casnan existente a subi 5,1% compara cu e luna anterior, y a yega na un tarifa anual ahusta segun stacion di 4,35 miyon unidad, segun National Association of Realtors (NAR).
E informe a agrega cu benta luna-pa-luna a subi den tur region di e pais.
E ritmo a supera e tarifa di 4,22 miyon unidad cu economistanan, segun encuesta di Dow Jones Newswires y The Wall Street Journal, tabata anticipa.
E resultado tambe a representa un mehoracion compara cu e cifra di november y a marca e nivel di actividad mas halto desde februari 2023, segun economista principal di NAR, Lawrence Yun, den un yamada cu prensa.
Condicionnan di mercado a cuminsa mustra señal di mehoracion durante e ultimo trimester di aña pasa, impulsa pa tarifa di hipoteca mas abao y un desaceleracion den aumento di prijs di casnan, Yun a bisa den un comunicado.
Esaki a pasa ora e hipoteca popular di 30 aña cu tarifa fiho a baha na december pa mas o menos 6,2%.
Sinembargo, Yun a adverti cu “nivel di inventario ta keda limita”, y a agrega cu doñonan di cas no ta den pura pa pone of kita nan cas for di mercado.
“Mescos cu den añanan anterior, ta anticipa mas inventario pa drenta mercado cuminsando na februari,” el a bisa.
E prijs mediano di benta, tumando na cuenta diferente tipo di cas, tabata $405.400 dollar, 0,4% mas halto cu un aña pasa.
