Desde caida di Nicolas Maduro den un accion militar Mericano, y e anuncio di presidente Donald Trump pa rebiba industria petrolero na Venezuela, atencion a cay un biaha mas riba e destino di Refineria di Aruba. Di un banda, premier Mike Eman (AVP) ya a descarta un reapertura, indicando cu ta bay enfoca riba energia sostenible. Pero di otro banda, politiconan di oposicion ta mira e desaroyonan regional como un oportunidad sorpresa pa Aruba.

Segun un comunicado di prensa, fraccion di MEP a pidi un reunion cu gobierno riba e futuro riba e refineria di Aruba, mirando e cambionan cu ta tumando lugar na Venezuela. “Ami ta un di esnan cu ta di opinion cu pa Aruba, e industria petrolero ta ‘gepasseerd station’. Principalmente door di e sancionnan Mericano riba e industria petrolero di Venezuela,” segun e comunicado di MEP.

Pero cu e cambionan cu ta vislumbra na Venezuela, specialmente pa loke ta e sancionnan Mericano, y e interesnan grandi di Merca, esaki ta habri oportunidadnan nobo pa Aruba.

“Mi opinion ta cu tanten cu ta un industria limpi cu ta cumpli cu standardnan di medio ambiente y cu ta crea empleo pa nos hendenan, ta nos deber moral ta explora e posibilidad”, lider di MEP, Evelyn Wever-Croes a duna di conoce. Conseheronan local ta consehando pa gobierno pone un pausa riba e plan di desmantelacion. Tambe nan a indica cu e facilidadnan na Aruba por ser renoba. Aruba tin tur cos pa e industria aki. Ta capital tin mester. Pues e no ta imposibel.

Fraccion di MEP kier sa si a haci un estudio pa compara e beneficionan economico pa Aruba di desmantelacion compara cu si Aruba ta “open back for business” pa e industria petrolero. Te ainda Gobierno no a haci e estudio ey. Fraccion di MEP ta conseha gobierno di Aruba pa tuma contacto cu e gobierno y companianan Mericano, y bisa cu Aruba ta open for business.

Fraccion di MEP ta spera cu e reunion ser yama riba termino corto, pa Aruba no perde e oportunidad.

Trafigura transportando crudo pa Corsou

Riba rednan social, un noticia cu a hala atencion recientemente ta cu compania Trafigura ayera a cuminsa transporta crudo pa Corsou.

Medionan di Reino, manera De Telegraaf, a reporta riba esaki.

“Un tanker petrolero transportando azeta Venezolano a mara na Corsou diaranson mainta, ora local. Esaki ta parti di un plan di dos di e traders di commodity mas grandi na mundo pa move petroleo Venezolano na facilidadnan di almacenahe den Caribe,” De Telegraaf a reporta.

Trafigura Group y Vitol Group ta bay ricibi al menos 4.8 miyon bari di crudo Venezolano e siman aki, segun agencia noticiero Bloomberg a reporta. E petroleo ta parti di un benta grandi di mas di 50 miyon bari, organisa pa Merca.

“Presidente Mericano, Donald Trump a bisa siman pasa cu su pais a tuma control di petroleo Venezolano despues cu tropanan Mericano a captura ex-presidente Venezolano, Nicolas Maduro. Trump tin intencion di bende e miyones di bari di azeta, segun De Telegraaf.

Bloomberg a reporta diamars cu cuatro tanki ta posiciona cerca di costa di Venezuela. E plan ta pa warda e crudo Venezolano den tankinan di almacenahe na Corsou y Bahamas. E prome di esakinan a yega Corsou ayera.

“Mientras e compania TRAFIGURA awe ta transporta crudo pa Curaçao pa storage, aki na Aruba e mesun compania a gana e destaho publico, pero gobierno AVPFuturo a bay mishi cu e procedura di destaho, a corumpi esaki pa acomoda nan amigo, y a core cu Trafigura,” Wever-Croes a bisa den un post riba su pagina di Facebook. “Quo Vadis, semper e cosnan aki mester pasa ora AVP ta den gobierno? Nos ta obliga di investiga aki tambe!”

Ayera tambe den otro post, Wever-Croes a critica e hecho cu gobierno actual no ta parce di mustra interes den e desaroyonan regional y posible oportunidadnan cu esaki por nifica pa Aruba.

“Merca ta bay elimina e sancionnan riba industria petrolero na Venezuela y ta invita companianan pa inverti. Aruba y Curaçao ta e mihor opcionnan. Curacao a tuma iniciativa mesora y a cuminsa negocia caba pasobra nan no kier pa Trinidad pasa nan dilanti,” Wever-Croes a skirbi. “Aki na Aruba no a haci net net nada, y e minister di Economia ayera a informa cu nan NO ta tene cuenta cu e industria aki pa diversifica nos economia. Dicon nan no ta busca oportunidadnan nobo pa Aruba? Storage di crudo ta un negoshi facil y ta trece placa facil aden pa Aruba! Nos ta trahando riba nos contactonan pa nos no perde e oportunidad aki.”

Capitulo cera

Mientras tanto, ta parce cu e posicion expresa anteriormente pa prome minister Mike Eman (AVP), cu un regreso na refinamento di petroleo na Aruba ta exclui definitivamente, no a cambia. Den declaracionnan ultimo lunanan, treci dilanti recientemente den medionan local y di Reino, Eman a enfatisa cu e refineria no ta bay reinicia operacion, y cu futuro di Aruba ta den otro industrianan: den desmantela e compleho industrial antiguo, sanea e sitio, y duna otro proposito na e area cu sostenibilidad y diversificacion den mente.

E mensahe a keda reforsa internacionalmente den reportahenan den medionan Hulandes, cu a presenta e clausura di e refineria como definitivo y cu mira pa futuro. Y manera Bon Dia Aruba a publica november ultimo, gobierno di Hulanda ta bay duna asistencia financiero y tecnico na Aruba pa desmantela e refineria y rehabilita e tereno, mientras tambe ta sostene inversion den infrastructura di energia renovable, manera reforsa e red electrico pa acomoda energia solar y di biento. Te awo, gobierno no a duna ningun indicacion cu e desaroyonan recien na Venezuela tin impacto riba nan maneho pa cu refineria.

Riba potret: CEO di Trafigura, Richard Holtum; CEO y fundador di Raisa Energy LLC, Luis Rodriguez; fundador di Parsley Energy, Brian Sheffield; ehecutivo di Vitol, John Addison; y director di Oficina di Cas Blanco di Liaison Publico, Jim Goyer, a atende un reunion cu presidente Mericano na Cas Blanco dia 9 di januari ultimo.