Mediante un post riba rednan social, Aruba Birdlife Conservation (ABC) a informa cu nan ta preparando pa protege e parhanan ‘tern’, conoci como bubi na Aruba.
“Na tur partido preparando proyecto cu por afecta nos bubi: por fabor sigura cu boso proyectonan ta desaroya den transparencia completo, sosteni pa MER/EIA di calidad halto, y cu ta involucra NGO for di e prome dia,” e fundacion a skirbi.
ABC a aclaria cu “e mensahe aki tambe ta dirigi na tur departamento di gobierno pa preveni proceduranan legal ripiti.”
“Aruba ta cas di mas di 10 especie di bubi. Pa awo, boso mester conoce nan tur. Nos ta bay protege tur dies,” e fundacion a priminti.
E bubinan mira riba e potret ta Sternchi Grandi, y a saca e potret na Baby Beach.
Ademas, e areanan cora mustra riba e otro potret (un chart di ABC cu ya ta incorpora den e ROPv existente) ta indica unda e bubinan di Aruba ta traha neishi cada aña. “Por fabor revisa esaki cuidadosamente. Como un ehempel, e area di refineria y Baby Beach ta entre e ubicacionnan cu nos ta bay ta monitoriando di cerca,” ABC a skirbi. “Considera e mensahe aki como un aviso formal.”
Pa finalisa, e fundacion a bisa cu “tolerancia pa e destruccion di naturalesa di nos isla no ta un opcion mas.”
