(Infobae) – Lider interino di Venezuela, Delcy Rodriguez, a declara diamars cu e pais a ricibi 300 miyon dollar for di benta di crudo Venezolano realisa pa Merca, y cu e fondonan aki lo ser usa pa sostene e bolivar.

Rodriguez a indica cu e suma ta parti di un operacion total di 500 miyon di dollar, y cu gobierno lo usa e recursonan pa interveni den bolsa di cambio. “E placa aki lo ser usa pa stabilisa e bolsa y protege ingreso y poder di compra di nos trahadornan,” el a sostene.

Washington a informa durante fin di siman cu presidente di Merca, Donald Trump, a negocia loke el a describi como un “acuerdo energetico historico” relaciona cu benta di crudo Venezolano. Segun gobierno Mericano, e operacion “lo beneficia pueblo Mericano y pueblo Venezolano”.

Trump a declara cu petroleo Venezolano por ser bendi na prijs di mercado y cu e ingreso lo keda bao di su control. “E ingreso lo ser controla pa mi, como Presidente di Merca” el a afirma.

Acceso na divisa tabata un factor central pa economia Venezolano desde 2018, ora e bolivar a perde gran parti di su balor y dollar a cuminsa ser usa ampliamente den transaccionnan interno. Desde e momento ey, tur dos moneda a coexisti den economia di e pais.

Falta di dollar a profundisa como resultado di embargo di Merca riba petroleo Venezolano, cu ta na vigor pa seis aña caba. E restriccion aki a reduci entrada di divisa y a subi balor di dollar contra moneda local.

Uso di dollar a expande den amplio sector di economia, mientras bolivar a mantene circulacion formal. Scarsedad di divisa a impulsa un subida den su prijs y a amplia e diferencia cu tasa di cambio oficial.

Firma Ecoanalytics a señala cu intervencion di regimen chavista den mercado di divisa ta apunta pa reduci gradualmente e gap entre tasa oficial di dollar y prijs di mercado paralelo. Segun e consultor, entrada di divisa lo aumenta oferta y modera presion cambiario.

Prome cu captura di dictador Nicolas Maduro dia 3 di januari, durante un atake aereo riba Caracas, Venezuela tabata ofrece descuento significativo riba su petroleo pa evita e embargo di Merca. E strategia aki a permiti sostene exportacion den un contexto di sancion.

China a surgi como e cumprado principal di crudo Venezolano durante e periodo ey. E benta a ser realisa a pesar di e restriccionnan imponi pa Washington riba sector energetico di e pais Sur Americano.

Merca a intensifica medidanan contra e operacionnan aki na luna di december, ora el a cuminsa confisca barconan cu tabata transporta crudo Venezolano sanciona. E accion aki a afecta exportacionnan y ingreso di divisa.

Declaracionnan di Rodriguez ta constitui e prome confirmacion oficial riba destino di e fondonan obteni for di benta di crudo maneha door di Merca. Regimen chavista no a detaya e mecanismo ni calendario di intervencion den mercado cu ta cambia.