Ministerio di Turismo, Transporte y Labor a informa cu e aña aki, a decreta cu Dia di Betico lo ser celebra dia 26 di januari, esta dialuna. Sinembargo, den un comunicado di prensa algun ora despues, a cambia a decision.

Segun e decreto, a tuma e decision aki den Conseho di Minister dia 19 di januari ultimo.

A tuma e decision pasobra dia 25 di januari, dia cu ta celebra Dia di Betico normalmente, ta cay riba un diadomingo na 2026. Esaki pasobra segun e decreto, “Celebra Dia di Betico riba dialuna 26 di januari ta contribui na un miho balans trabao-bida personal, ya cu esaki ta evita di cay hunto cu e weekend regular, mientras ta permiti atendencia na ceremonianan y participacion den actividadnan conmemorativo,” ta continua splica. “E balor simbolico di Dia di Betico tin raiz profundo den identidad Arubano y den e lucha pa autonomia, y e dia merece henter e espacio pa un celebracion completo y respetuoso.”

Sinembargo, algun ora despues, mediante un comunicado di prensa, minister di Turismo, Transporte y Labor, Wentrick Cicilia (AVP) a aclaria cu “gobierno no por sin mas impone un dia liber pa sector priva”, indicando cu “minister Cicilia a haci lo posible pa otorga e dia liber na sector priva, sinembargo den cuadro di ley, esaki no tabata un posibilidad.”

“Mester aclaria cu e dia liber y di fiesta ta keda diadomingo. E dia siguiente ta un dia extra di descanso cu gobierno ta ofrece na su empleadonan. Pues si un empleado traha riba dialuna, e lo no cobra dobel, solamente si mester traha riba diadomingo dia 25 di januari 2026,” e minister a bisa den e comunicado.

“E berdad ta cu den varios sector, e decision pa cambia e dia liber di diadomingo pa dialuna, den un lapso di tempo asina cortico, lo a causa retonan inespera. P’esey ta subraya cu e dia liber dialuna ta pa gobierno y pa sector priva un apelacion,” e comunicado ta agrega.

“Mi ta di acuerdo si cu nos mester cambia e ley aki back, manera e tabata den pasado, unda e minister por cambia e dia di celebracion pa un dia despues, si e fecha ta cay den weekend. Parlamento algun aña pasa a cambia e ley, marando man di e mandatario y limitando e opcionnan. Mi lo traha riba e cambio aki y pronto mand’e pa busca sosten den Parlamento di Aruba”, Cicilia a bisa.