(AFP)—Un documental nobo di Michael Jackson cu a estrena na Reino Uni diaranson ta presenta grabacionnan di audio nunca scucha antes, unda e cantante ta comparti su pensamentonan riba muchanan, incluyendo cu e tabata kere cu nan tabata kier touch e.
E documental di cuatro parti, “Michael Jackson: The Trial”, produci pa Wonderhood Studios di Londres, ta analisa e huicio criminal di 2005 unda e strea di pop a ser acusa—y despues absolvi—di abuso sexual di un mucha menor, Gavin Arvizo, na su finca Neverland na California.
Den un trailer di e documental riba website di Wonderhood, por scucha Jackson bisando: “Muchanan kier simplemente touch mi, brasa mi.”
“Muchanan ta enamora di mi personalidad,” e tambe ta bisa den e grabacion. “Tin biaha esaki ta hinca mi den problema.”
E documental, cu ta ser transmiti riba Channel 4 di Reino Uni, ta usa entrevista, material audiovisual nunca antes mira y e audio nunca publica di e cantante pa bay “mas leu cu e circo mediatico” rond di e huicio famoso di 2005 y pa haci preguntanan “profundo tocante fama, raza y e sistema di husticia Mericano,” segun Wonderhood a indica riba su website.
E audio ta bin for di un entrevista cu un rabbi cu Jackson a consulta pa “guia spiritual,” segun Channel 4 a bisa den un declaracion.
“Den oras di entrevista graba, Jackson ta confesa secretonan intimo,” e emisora Britanico a bisa.
“E filmnan, di cual mayoria nunca a ser transmiti antes, ta duna un bista sin precedente den e estado mental di Michael y su infancia dificil,” y tambe ta mustra su “fihacion” cu Arvizo, segun e declaracion.
E homber conoci como e Rey di Pop, ken a muri na 2009, tabata un tema di hopi otro pelicula enfoca riba acusacionnan cu el a abusa di muchanan jong, incluyendo “Leaving Neverland” (2019), tambe transmiti riba Channel 4, cu a provoca reaccion fuerte di su famia.
“Michael no ta aki pa defende su mes; si e tabat’ey, no lo a haci e acusacionnan aki,” su famia a bisa e tempo ey.
E estreno di e documental nobo ta bin par dia despues di e publicacion di e trailer di e biopic “Michael”, cu ta presenta sobrino di Jackson, Jaafar, den e rol principal. E film ta programa pa sali den cine riba 24 di april.
Jackson a muri riba 25 di juni 2009 despues di a ricibi un dosis letal di e anestesico propofol. Durante su bida, el a enfrenta varios acusacionnan di abuso sexual di mucha.
Ademas di su absolucion na 2005, e artista a paga un areglo hudicial di 15 miyon dollar na 1994 den un otro caso cu tabata involucra un mucha.
