Ayera mediante un comunicado, Corte di Husticia a informa cu a tuma e decision pa instala un hekwerk temporario. Esaki despues di un incidente den cual a haya un adicto ambulante ta drumi dilanti porta di Corte.

“Pa motibo di e problema cu adicto ambulante dilanti Corte di Husticia, a dicidi pa pone hekwerk temporario dilanti di e edificio,” Corte a informa. “Esaki no lo stroba nos entrada principal pa publico. Mientras tanto lo busca un solucion permanente.”

E desaroyo aki ta yega despues di un incidente specifico, reporta den algun medio di comunicacion local, unda tabatin un adicto ambulante tabata set up dilanti Corte, strobando acceso. Pero e tambe ta yega den un marco mas amplio unda e problema di adicto ambulante, particularmente den centro di ciudad, ta empeorando.

Falta di maneho efectivo

Di su banda, parlamentario Eduard Pieters di PPA a informa den un comunicado di prensa cu el a manda pregunta “mas profundo di siguimento” pa minister di Asunto Social, Mervin Wyatt-Ras (AVP), “tocante e falta di un maneho efectivo pa e problematica di adictonan ambulante riba nos isla.”

Segun Pieters, den un contesta anterior cu fraccion PPA a ricibi for di e minister, Wyatt-Ras “a indica cu e maneho ta den un ‘fase final’ di su desaroyo,” pero cu a keda falta “datonan concreto pa acordacion y implementacion di e maneho y un base financiero.”

Den e comunicado, Pieters ta expresa su preocupacion riba e contestanan vago di e minister. Mientras cu e mandatario ta papia di un “prioridad halto”, den practica e ciudadano no ta mira ningun cambio. Pieters ta exigi awor un fecha limite definitivo pa implementacion di e maneho y un presentacion na Parlamento denter di un luna despues cu esaki keda acorda. “Sin fechanan concreto, e maneho aki ta keda solamente riba papel y no tin su efecto desea” e lider di PPA a enfatisa.

Ademas, Pieters tin su dudanan riba e ley nobo cu mester reconoce adiccion como un enfermedad y cu mester habri caminda pa admision obligatorio. E parlamentario ta pidi e minister pa splica con lo bay balansa e “derecho di ayudo” di e adicto cu e necesidad di “admision obligatorio” pa proteccion di e comunidad.

Falta di capacidad y recurso 

Un punto di preocupacion grandi ta e falta di capacidad di cuido. E minister mes ta reconoce cu falta recursonan importante di cuido structural, pero ainda no tin un inventarisacion di e cantidad di cama y personal cu falta pa por garantisa e cuido aki legalmente, segun Pieters. “Pa fraccion di PPA ta incomprendibel cu no a haci un analisis financiero di e costonan pa rehabilitacion local compara cu e maneho actual di manda adictonan den exterior” Pieters a declara. Pieters kier sa tambe specificamente cuanto placa tin reserva riba presupuesto 2026 pa soluciona e faltanan structural aki den cuido di adiccion.

Cuido di salud mental bao presion 

E preguntanan aki no ta para nan so. Anteriormente Pieters a expresa su preocupacion caba riba e salud mental en general na Aruba, incluyendo e listanan di espera largo na Respaldo y e scarsedad di profesionalnan manera psikiatranan y psicologonan. Ademas e falta di colaboracion efectivo y eficiente entre TUR instancia di salud mental na Aruba.

Pieters ta subraya cu un maneho integral ta necesario. “PPA lo sigui presiona pa transparencia y determinacion, pa asina tanto e adictonan como e comunidad di Aruba haya e cuido y seguridad cu nan merece.”