Ciudadanonan ta bati alarma pa hortamento den varios bario

Diaranson a surgi un publicacion riba rednan social unda un usuario den e grupo ‘Vraag en Aanbod’ a bati alarma pa supuesto hortamento den varios distrito pabao di Aruba. Esaki ta sigui algun caso cu a surgi unda tambe a nota actividadnan di ladronicia den varios bario.

Segun e usuario, el a haya informacion cu un grupo grandi di ladron ta hortando full rond di e isla, organisando hortamento den varios bario y distrito, incluyendo Cumana, Pavia, Tanki Leendert, Tanki Flip, Shaba, Bubali y Noord.

E usuario a adverti cu e personanan aki ta horta tur anochi. Segun nan drenta un bario, eynan nan ta sigui horta, segun e publicacion. Ademas a menciona cu e ladronnan ta kibra benta di auto pa busca cosnan di balor y tin biaha sa hasta bay cu auto pa despues bende esaki ilegalmente.

Den su publicacion, el a acompaña su advertencia cu un potret di un sospechoso cu tabata canando rond den cura di hende cla pa horta, segun e usuario. E usuario a conseha otronan pa instala camara di vigilancia rond y paden di cas, ya cu e ta agrega cu e ladronnan aki tambe sa horta den cas di hende.

E advertencia aki ta sigui algun caso cu a surgi e luna aki tocante ladronnan den varios bario di Aruba. Recien a surgi un caso di ladronicia na Alto Vista, unda camara di seguridad a captura un persona cu bais ta canando rond di un auto staciona. E auto aki tabata para pa bende, y—segun a reporta—a captura e sospechoso cobando den dje pero no a logra bay cu algo.

Na Cumana tambe tabatin un otro caso di ladronicia, unda e sospechoso a encontra cu e doño di cas, y den su spanto a core bay. Segun reportahenan tocante e caso aki, e ladron tabata activo den oranan di madruga y ta sigui un patronchi cu a surgi den e ultimo dianan, cu ladronnan activo den Tarabana y Sabana Blanco tambe

Un yamado ta bay na comunidad di Aruba pa sea alerta di cualkier actividad sospechoso rond di bo cas, instala camara di vigilancia unda por, warda cosnan di balor y yuda bo bisiñanan tambe.

Varios residente den comentario di e publicacion riba red social tambe a expresa nan preocupacion cu e tendencia aki y ta haci yamado na Cuerpo Policial pa keda atento na casonan cu ta surgi, y fortalece patruya y aplicacion di ley pa asina preveni hortamento den mas bario.