Fraccion di MEP a cuminsa cu reunionnan cu stakeholders tocante e posibilidadnan di industria petrolero pa Aruba. Meta di e reunionnan ta pa comparti informacion, y pa haya sa e pensamento y sentimento di stakeholders.

Segun un comunicado di prensa, fraccion MEP reuni caba cu algun representante di trahadornan di sector publico y semi-publico. E reunionnan lo continua den e siguiente dianan.

Desde 3 di januari 2026 tur cos a cambia pa Aruba. Desaroyo di energia petrolero cu no tabata posibel pa hopi aña, debi na e sancionnan Mericano riba Venezuela, desde e fecha aki no ta un estorbo mas. Es mas, Merca tin pensa di inverti 180 pa 200 biyon dollar den industria petrolero di Venezuela, mirando e gran potencial di Venezuela. Y den esaki Aruba por hunga un papel unico y hopi importante.

“Nos no ta papiando di habri un refineria nobo na Aruba. Nos ta papiando di e posibilidad di lease e tankinan di almacena crudo na Aruba, na companianan cu ta buscando tanki pa almacena e crudo. Aruba ta geograficamente ideal pa e tipo di comercio aki, y e lo no haci un impacto grandi riba nos infrastructura of medio ambiente.

Ademas, tin companianan cu ta dispuesto pa inverti den drecha tur e tankinan y asina por almacena mas crudo. Mirando cu e desaroyo aki ta di impacto abou, pero di balor halto, fraccion di MEP ta di opinion cu no mester laga e oportunidad aki pasa bay. E ta un forma relativamente simpel cu Aruba por haya mas entrada, y diversifica nos economia, sin cu e mester costa pais Aruba mes nada.

Esaki ta locual nos ta deliberando cu stakeholders pa mira si tin sosten amplio den comunidad pa e desaroyo aki. Si nos sinti cu tin e sosten amplio, nos lo pone nos contactonan pa asina yuda gobierno desaroya nos economia mas ainda. Di e prome reunion por a nota un sosten pa esaki. Nos a delibera riba otro posibilidadnan tambe pa desaroya nos economia. Tabata un bon reunion y mi ta gradici lidernan sindical pa nan presencia. Desde oposicion nos ta scucha y aporta na progreso di nos pais”, tabata palabranan di lider di Fraccion MEP Evelyn Wever-Croes.

Nota di redaccion: E articulo aki ta opinion di e autor y no ta representa opinion di Bon Dia Aruba.