Recientemente, un grupo grandi di turista, mayoria Mericano pero tambe di otro pais, a acerca redaccion di Bon Dia Aruba pa expresa nan preocupacion y malcontento pa e trato cu nan ta bin hayando di Occidental Vacation Club, cu ta strobando nan di bishita Aruba pa vakantie.

Ta importante pa remarca cu mayoria di e turistanan cu ken Bon Dia Aruba a combersa tin decadas ta bin Aruba tur aña cu vakantie. E problema cu nan ta enfrentando, segun nan a conta no ta precisamente nobo, pero den ultimo añanan ta birando pio.

E grupo di turista – cu tur tin miedo di bin dilanti pa motibo di represalia – tur ta miembro di Occidental Vacation Club (OVC). A diferencia di un “timeshare” tradicional, unda e persona ta cumpra un sitio specifico, e idea tras di e “vacation club” ta cu por usa e miembresia na diferente hotel na Aruba, Mexico, Republica Dominicana y otro destinacionnan. Sede di OVC ta na Republica Dominicana, loke ta nifica cu tur reservacion y mayoria di comunicacion ta bay via Santo Domingo. E hotel miembro di OVC na Aruba ta Barcelo, pero Barcelo y OVC ta dos compania separa.

No tin camber disponible

Varios di e personanan cu ken Bon Dia Aruba a combersa a indica cu un di e motibonan pakico a dicidi di cumpra e miembresia ta precisamente pasobra nan ta bin Aruba tur aña. Sinembargo, den ultimo añanan hopi di nan a haya problema na momento di kier haci nan reserva pa Aruba. Na momento cu kier haci reservacion, OVC ta bisa nan cu “no tin camber disponible” pa e fechanan ey. Den e-mailnan cu Bon Dia Aruba a mira, OVC a hasta bisa cu “no tin disponibilidad” pa e miembronan den henter aña 2026, y esaki na comienso di januari!

“E ta un estafa,” un di e turistanan a comenta. “Ami a haci mi reserva online a traves di e hotel, y e ora si nan tabatin disponibilidad. Pero ora mi pidi pa usa mi timeshare, diripiente no tin camber disponible.”

Otro persona a splica cu tin areanan di e hotel na Aruba – Barcelo – cu ta supposed di ta designa pa miembronan di OVC. Sinembargo, ora e tabata kedando eynan y a sinta combersa cu otronan kedando den e cambernan ey, a bin resulta cu tin hende cu ta reserva simplemente via e website di e hotel y ta haya e cambernan di OVC – mientras esnan cu ta miembro di OVC ta ser bisa cu no tin camber disponible.

“Ta pasobra nan ta gana mas placa via e hotel mes compara cu OVC. Pero basicamente ta estafando nos!”

E turistanan ta desespera. Varios di nan a conta Bon Dia Aruba cu durante e presentacion di benta, OVC a bisa nan claramente cu nan lo por book pa Aruba. Pero awo, despues cu nan tin añas ta paga, ta bisa nan simplemente pa reserva na otro destinacion. Loke ta importante pa nota ta cu e Vacation Club no ta suppose di ta manera un timeshare normal, unda reserva na cierto destinacionnan ta un “opcion” segun cu tin disponibilidad. Y hasta si esey tabata e caso, al menos dos persona cu ken Bon Dia Aruba a papia a cumpra nan miembresia na Aruba mes, y toch nan no por haya pa reserva nan camber. “Prome cu firma e contract, nos a confirma varios biaha cu management di OVC cu nos lo por reserva nos estadia na Barcelo Aruba sin importa unda a cumpra e contract original. Nan a sigura nos cu nos tabata miembro completo di OVC,” un di e personanan afecta a bisa. Sinembargo, na momento cu a purba di haci su reservacion pa Aruba, personal di OVC a bis’e cu su contract “no ta pa Aruba.” Esaki a keda confirma pa mas hende.

Den nan desesperacion, algun di e personanan a pidi pa reserva cualkier camber, hasta di menos balor cu esun cu nan a cumpra den nan contract. Asina mes, OVC ta keda insisti cu “no tin camber disponible”, niun camber na niun fecha, y asina ta keda sin honra e contract.

Tur e bishitantenan aki, pasobra nan tin añas y decadas ta bin Aruba, ta hopi sorprendi di ricibi e tipo di trato aki. Nan ta describi e practicanan di e hotel como “bait and switch,” unda na momento di bende nan e contract a bisa algo, pa despues haci algo otro. E practica aki ta ilegal.

A pesar cu esaki tabata e problema mas grandi cu e bishitantenan aki a trece dilanti, tin mas practica dudoso na OVC. Por ehempel, no por haci ningun pago pa reservacion, impuesto etc. na Aruba. Tur pago mester bay Santo Domingo prome cu nan yegada. Ademas, OVC ta nenga di haci cambio na reservacion di antemano, mientras cu den e contract ta stipula cu por haci cambio 48 ora prome cu yega e hotel, pasobra nan ta tarda 6 pa 8 siman pa procesa e pago cu credit card, loke ta limita e habilidad di e usuarionan pa haci reservacion.

Esaki a causa hopi ansiedad y decepcion entre esnan afecta, cu a haya nan mes confronta cu situacionnan hopi fastioso, y nan vakantie a keda daña, maske nan a traha duro y paga hopi placa p’e.

Esaki no ta e unico kehonan. Tambe a conta cu tin pesimo servicio na cliente, cu no ta purba yuda nan of resolve nan keho, y asina tin hopi mas pa conta.

OVC ta un scam?

Un investigacion superficial online rapidamente ta mustra cu Occidental Vacation Club tin un reputacion dudoso entre hopi usuario. Hopi di reviews negativo ta menciona e mesun practica di “bait and switch”.

“Si mi por a duna cero strea, mi lo hacie,” un persona a bisa riba Trip Advisor. “Ora mi a cumpra e miembresia di Occidental, rapidamente mi a realisa cu a estafa mi pero no tabatin manera pa sali di e contract. Mi a dicidi di usa e miembresia. Sinembargo, cada biaha cu mi a haci un reservacion of purba di haci un reservacion, e unidad cu mi a cumpra cu mi miembresia nunca tabata disponible, y mi tabata haya un camber di menos balor na otro hotel.” E review aki ta di tres aña pasa.

“Evit’e,” otro a bisa simplemente riba e website p*ssedconsumer.com. “Nos a cumpra nos miembresia mas cu 20 aña pasa y durante añanan nos a purba di tin pasenshi y comprension. Cu cada estadia nos mester a lucha pa haya e servicionan di miembro na cual nos tabatin derecho.”

“Sea cauteloso pasobra unabes bo cumpra, nan no ta cumpli.”

Otro review riba Trip Advisor, di aña 2012, ta bisa: “E manera cu Occidental ta opera ta cu nan ta usa tactica di ‘bait and switch,’” similar na loke e personanan cu a papia cu Bon Dia Aruba a expresa.

Bon Dia Aruba a tuma contacto cu OVC a traves di nan website, pero te ciere di redaccion, no a ricibi un contesta.

Accion legal

Den casonan di problema unda un consumidor ta sospecha cu a bira victima di un estafa, ta recomenda pa tuma accion legal mediante un abogado. Den e caso di OVC na Aruba, tambe a recomenda e turistanan afecta pa entrega un keho formal na Departamento di Asunto Economico.

Al menos un di nan a indica cu ya a cuminsa accion legal na Merca contra e practicanan dudoso di OVC. Sinembargo, hopi di nan ta preocupa cu tuma accion legal contra un cadena di hotel lo bira un proceso hopi costoso, largo, y no tin garantia cu lo resolve e disputa.

Pero tur e personanan cu ken Bon Dia Aruba a papia a expresa nan decepcion grandi pa e trato cu nan ta ricibi, y e hecho cu autoridadnan na Aruba no ta involucra ni interesa den loke ta pasando riba nos propio isla. Nan ta spera cu trece esaki den luz publico por pone autoridadnan tira un bista mas critico riba e manera con cierto companianan ta trata nos turistanan leal cu tin decadas ta bishita y stima Aruba.

Lo mas lamentable ta cu algun di e turistanan menciona den e articulo aki a expresa cu nan ta considerando no bin Aruba mas, lagando atras decadas di amistad, relacion y un comunidad na cual nan a pertenece pa decadas. “Mi ta spera autoridadnan di Aruba tuma accion pa defende nos,” un di nan a urgi. “Esaki no ta e Aruba cu nos conoce.”