(AFP)—Oficina di Dalai Lama a bisa diadomingo cu e nunca a cera conoci cu e delincuente sexual condena Jeffrey Epstein, despues cu medionan Chines a reporta cu e nomber di e lider Budista Tibetano a ser menciona den un lote di archivonan publica pa gobierno di Merca.
E Departamento di Husticia di Merca a publica luna pasa e ultimo tanda di e archivonan di Epstein—mas di tres miyon documento, potret y video relaciona cu e investigacion riba e financier condena.
Un buskeda di AFP den e archivonan a revela cu e nomber di Dalai Lama a ser menciona mas di 150 biaha, sin ningun mencion cu el a cera conoci of a interactua cu Epstein. E mencion di un persona su nomber den e archivonan di Epstein no ta implica automaticamente ningun mal conducta di su parti.
“Algun reportahenan reciente den medio y publicacionnan riba red social tocante e ‘archivonan di Epstein’ ta purba conecta Su Santidad e Dalai Lama cu Jeffrey Epstein,” e oficina di e lider a bisa den un declaracion publica riba X.
“Nos por confirma sin ningun duda cu Su Santidad nunca a cera conoci cu Jeffrey Epstein ni a autorisa ningun encuentro of interaccion cune di parti ningun hende den su nomber,” e declaracion a agrega.
Riba diahuebs, e cadena estatal Chines China Global Television Network (CGTN) a reporta cu e ‘Dalai Lama’ a aparece por lo menos 169 biaha den e archivonan di Epstein y a menciona un email unda un remitente desconoci a bisa Epstein cu e tabata considerando bay na un evento cu e Dalai Lama lo asisti.
E ganador di Premio Nobel di Paz cu tin 90 aña a huy for di e capital Tibetano Lhasa ora cu e tabatin 23 aña, pa salba su bida despues cu tropanan Chines a aplasta un rebeldia na 1959, despues di e anexacion di Tibet na 1951.
Awor e ta bibando den exilio den ciudad Indio di Dharamsala, noord di India, y ta liderando un campaña pa mas autonomia pa Tibetanonan, loke China a condena, yamando e lider spiritual un rebelde y separatista.
Un otro buskeda den e archivonan di Epstein, cual a ser publica pa e Departamento di Husticia di Merca y obteni pa AFP, a produci 154 resultado tocante e Dalai Lama.
AFP no a identifica ningun mencion of sugerencia di un encuentro entre e Dalai Lama y Epstein.
E email menciona pa CGTN y revisa pa AFP a ser manda pa un persona di ken su nomber tabata tapa, unda e remitente a skirbi na Epstein: “Tocante e evento cu mi a conta bo casi un luna pasa riba e isla, cu e Dalai Lama ta bin y mi kier bay pa mir’e. Pero mi por salta e evento aki si bo mester di mi ayudo awe.”
Den un siguiente email, e mesun persona a skirbi: “…ta bayendo awor pa e evento cu e Dalai Lama.”
Den ningun di e emailnan tin mencion cu e persona realmente a encontra of a mira e Dalai Lama, cu durante añas a haci hopi aparencia publico rond mundo.
Epstein a ser condena na 2008 pa solicita un menor pa prostitucion. El a muri pa suicidio na 2019 mientras cu e tabata den prison enfrentando acusacionnan di trafico sexual.
Varios figura publico di alto perfil a keda implica den e ultimo publicacion di documento na Merca relaciona cu e financier, unda algun a renuncia di nan trabao, y ta enfrentando investigacion oficial y cuestionamento publico.
