Ayera durante atardi, operacionnan di Aeropuerto Internacional Reina Beatrix a keda paralisa pa algun ora. Esaki relaciona cu un incidente di seguridad, cual medionan local a identifica como un menasa di bom. Pa alrededor di 4or di atardi sinembargo a reanuda operacion.

Den un comunicado di prensa alrededor di 1pm, Aruba Airport Authority a informa:
“Aruba Airport Authority NV (AAA) ta confirma cu operacion di e aeropuerto a keda para temporalmente como un medida di precaucion despues di un situacion relaciona cu seguridad involucrando un avion.

“Di acuerdo cu protocolnan estableci di seguridad, e situacion ta siendo maneha pa e autoridadnan apropia. Na e momento aki, no tin indicacion di ningun menasa inmediato pa seguridad publico, y tur accion tuma ta parti di proceduranan standard pa garantisa e seguridad di e pasaheronan, personal, y partnernan di aeropuerto.

“Acceso di e pasaheronan na e terminal a keda suspendi temporalmente mientras ta atende cu e asunto. AAA ta trahando di cerca cu tur stakeholder relevante pa duna sosten na e situacion y facilita un regreso sigur y ordena na operacion normal lo mas pronto cu ta posible.

“Aruba Airport Authority ta enfatisa cu seguridad ta keda su prioridad di mas halto y ta aprecia e cooperacion y profesionalismo di tur partido involucra. Ta bay comunica mas actualisacion mediante canalnan oficial unda cu ta apropia.”

Mas o menos un ora despues, AAA a informa cu “como precaucion, a restringi acceso di pasahero na e terminal, y ta pidiendo pasaheronan pa keda afo na e momento aki. Pasaheronan cu ya ta paden di e terminal no ta siendo evacua.” Ademas, a informa cu como parti di procedura standard di seguridad, algun vuelo por keda pausa of desvia te cu e operacion normal reanuda.

Finalmente, pa alrededor di 4pm, AAA a confirma “cu operacion di aeropuerto ta reanudando despues di e situacion di seguridad anterior. Procesamento di pasahero a cuminsa, y operacion di vuelo ta bay bolbe normal gradualmente.” A nota cu ta bay tin cantidad “mas halto cu usual” di pasahero, y a conseha pasaheronan pa check directamente cu nan aerolinea pa informacion di vuelo actualisa.

Menasa di bom

Den su comunicacion oficial, AAA no a duna ningun detaye di kico precies tabata e “situacion di seguridad” cu a confronta y a ocasiona e interupcion na aeropuerto.

Sinembargo, den medionan di comunicacion local a menciona cu ta trata di un ‘bom melding’ abordo di un vuelo di Jet Blue, cual a identifica como un vuelo for di Boston. Segun rumornan y informacion no oficial riba rednan social, a ricibi un bom melding na facilidadnan di aeropuerto, cu personal di seguridad di e aeropuerto lo a confirma. Esaki a ocasiona e despliegue di team di bom incluyendo unidad special K9, y personal di emergencia cu a haci inspeccion di e sitio pa determina si e menasa tabata serio.

Un usuario, J.D. a bisa cu “e menasa di bom a ser haya riba un papel den un vuelo di Jet Blue for di Boston.” Otro turista cu tabata na Aruba na e momento ey, a confirma e informacion aki.

E informacion aki no a keda confirma pa AAA.

Inconveniencia

Manera por anticipa, e situacion a crea inconveniencia cerca hopi turista cu nan vuelo a keda atrasa of desvia. Riba rednan social, hopi informacion tabata circula indicando cu un cantidad di vuelo cu tabata caminda pa Aruba a keda desvia pa Corsou, otronan pa Puerto Rico. Otro vuelonan a keda na nan ciudad wardando pa reapertura di aeropuerto di Aruba.

Ademas di vuelonan atrasa, a cera e caminda y no tabatin acceso pa aeropuerto, loke a pone cu taxi y otro transporte a baha nan pasaheronan na un distancia y e hendenan mester a cana pa yega aeropuerto.

Un vlogger, Ramsay Soemantha di The Soemantha BLOG, a comparti un video den cual ta mustra e vlogger ta cana den mondi purbando di yega aeropuerto durante loke el a yama e “caos” na aeropuerto. “Tur caminda di acceso ta den lockdown total despues di un menasa di bom riba e taxiway,” Soemantha a skirbi den un post riba rednan social. “Nos chauffeur a djis laga nos memey di un mondi desola, puntando den distancia y bisando nos pa ‘djis sigui cana’. Aventura of mision di sobrevivencia? Desea nos suerte, nos ta bayendo off-road pa gara e vuelo ki!”

Den e video, Soemantha a bisa cu “semper ta leuk pa tin cosnan pa conta ora bo yega cas,” mientras e ta cana den loke ta mustra un area di mondi. “Nos ta canando den un pida mondi ‘ki, paso blijkbaar tin un bom melding na Aruba. Nan ta bisa cu nan a cera henter e caya, ay ay ay. Nos vuelo ta supposed di sali, pero nos tin cu wak con nos ta yega airport.”

Na dado momento, por mira Soemantha ta crusa e caya principal banda di aeropuerto cu di berdad ta cera y no tin niun auto riba dje.

Mientras cu Soemantha no a duna un update si a logra drenta aeropuerto y aborda su vuelo, AAA si a confirma cu operacion a reanuda, y tabata spera cu a pesar di un atraso, tur hende lo yega nan destinacion.