Durante e regiezitting (audiencia preliminar) den apelacion di e asina yama caso “New York”, Corte di Apelacion a determina cu tratamento di e caso lo tuma luga dia 22 di mei marcando un momento importante den un proceso hudicial cu ta draai rond di acusacionnan serio di corupcion, violacion di secreto oficial y e limite entre libertad di prensa y responsabilidad penal.

E sospechoso, periodista N.M.Q.C.d.A., no tabata presente, pero su abogado, Doris Canwood, si tabata presente pa representa su interes durante e audiencia. Tanto e sospechoso como Ministerio Publico (OM) a apela e sentencia di Corte di Prome Instancia di december 2024.

Durante e audiencia ni defensa, ni OM a presenta ningun peticion pa investigacion adicional. Rapidamente corte a determina cu e caso lo ser trata dia 22 di mei, ora e partidonan lo por presenta nan argumento y corte lo evalua e caso den su totalidad.

Caso “New York” ta un caso penal cu a genera hopi interes publico pasobra e ta involucra un agente policial y varios periodista, y e ta toca tema sensitivo manera secreto oficial, corupcion y libertad di prensa.

Den e fase anterior di e proceso, agente policial R. Vos a ser sentencia dia 8 di december 2023 na 16 luna di prison, di cual 8 luna tabata condicional. Corte a haya cu e tabata culpabel di malversacion, violacion di secretonan di trabao, abuso di su funcion y soborno ricibi di parti di miembronan di prensa. Ademas, corte a prohibie el di eherce su trabao di polis pa un periodo di tres aña.

Pa loke ta e cuatro periodista involucra den e caso, nan a ser acusa cu, for di periodo entre januari 2021 te cu maart 2023, nan a actua conhuntamente y intencionalmente pa viola secretonan cu nan tabata sa cu e ambtenaar, relaciona cu su funcion, tabata obliga pa mantene confidencial. Ademas, e acusacion a inclui cu nan a participa den un organisacion cu tabata consisti di un y/of mas otro persona, cu e meta di comete crimen, manera corupcion di un ambtenaar, duna y/of tuma soborno, maluso di funcion y violacion di secreto di trabao.

Despues di e sentencia inicial den Corte di Prome Instancia, corte a yega na un conclusion mixto riba e acusacionnan. Riba e acusacion di soborno, tres di e sospechosonan a ser declara culpabel. Sinembargo, pa loke ta e acusacion di participacion den un organisacion criminal, tur cuatro periodista a ser declara liber, pasobra corte a determina cu no tabatin suficiente prueba pa confirma cu nan a comete e acto ey segun e definicion legal. Pa e acusacion di violacion di secresia oficial di un agente policial, tur cuatro periodista a ser declara culpabel.

Corte a determina cu durante un periodo di mas cu dos aña, e periodistanan aki tabatin acceso na portofon di Cuerpo Policial di Aruba. Segun corte, e acceso aki a ser haci posibel hunto cu e agente policial menciona, pa medio di un conexion digital cu nan a crea entre un portofon y e laptop di e periodistanan individual. Debi na e hecho cu nan a coopera cu e agente policial pa logra e acceso, corte a conclui cu nan a viola secresia oficial, mescos cu e agente policial mes a viola e obligacion di confidencialidad.

Ademas, corte a determina cu den e mesun periodo, tres di e periodistanan a duna regalo y a haci promesa na e agente policial, loke corte a considera como accionnan cu a cay bao di definicion di soborno.

Den december 2024, corte a dicta sentencia pa e periodistanan involucra. Den caso di periodistanan R.P.L. y N.E.A.G., tur dos a ser condena na 240 ora di trabao comunitario y 12 luna di prison condicional, cu un periodo di prueba di tres aña. E sentencia condicional ta implica cu si nan comete un delito durante e periodo di prueba, corte por ordena cu e 12 luna di prison mester ser ehecuta.

Den caso di periodista B.L.R.K., corte a impone un castigo di 150 ora di trabao comunitario y tres luna di prison condicional, tambe cu un periodo di prueba di tres aña. Pa e caso aki, corte a tuma na cuenta cu e periodista ta residente na Hulanda. Segun e abogado di e sospechoso, tin un areglo cu Reclassering na Hulanda cu den caso cu e castigo ser converti na un castigo incondicional, B.L.R.K por tuma contacto cu e instancia na Hulanda y lo cay bao di nan guia.

E sentencia mas pisa a ser impone riba sospechoso N.M.Q.C.d.A. Corte a considera cu e tabata involucra den un caso similar anteriormente, y p’esey el a ser condena na 18 luna di prison, di cual 12 luna tabata condicional. Esaki ta nifica cu e mester cumpli minimo seis luna den prison.

Corte a señala cu e hecho a tuma luga solamente dos luna prome cu su periodo di prueba di un caso anterior a caba, loke a pisa den e determinacion di e castigo.

Un di e puntonan principal cu defensa a presenta durante e proceso tabata cu periodistanan tin libertad di recopila noticia, y cu esaki ta inclui informacion cu nan por haya via fuente manera e portofon di polis. Den su sentencia, hues a reconoce cu e argumento aki ta toca un derecho importante y a indica cu libertad di prensa mester ser proteha y respeta den un sociedad democratico.

Sinembargo, hues a subraya cu e derecho aki no ta sin limite. Segun e motivacion di corte, libertad di prensa por ser limita door di derecho penal y door di normanan di cuido debido. Corte a enfatisa cu periodistanan no mag comete hechonan castigabel pa obtene informacion. Den e caso aki, corte a determina cu e periodista involucra a comete acto castigabel pa logra acceso na informacion confidencial, y esey a forma e base pa e condena.

Cu e regiezitting di apelacion completa y fecha di 22 di mei ya fiha, caso New York lo sigui pa e proximo fase, unda Corte di Apelacion lo trata e asunto den detaye y lo evalua e apelacionnan presenta tanto di parti di defensa como di parti di Ministerio Publico.