Documental riba SDG ta pone urgencia di pobresa y seguridad alimenticio den spotlight

Conseho Social Economic (SER) a facilita diabierna 6 di februari ultimo den su sala di reunion, di forma exclusivo, un proyeccion di e prome episodio di e serie documental The State of the SDGs; Navigating Sustainability on Curaçao.

Miembronan di SER, representantenan di organisacionnan di sociedad civil, partnernan social y otro stakeholdernan a bin hunto pa refleha riba nificacion practico di e Metanan di Desaroyo Sostenibel (SDG’s) pa Corsou.

E SDG-nan ta parti di e Agenda 2030 pa desaroyo sostenibel, cu tur pais miembo di Nacionnan Uni a adopta na 2015 y cu ta duna direccion mundial pa accion coherente den areanan social, economico y di medio ambiente. Na Corsou, e cuadro di SDG-nan ta integra den e arkitectura di maneho publico pa medio di e National Development Plan 2015–2030, completa cu un roadmap pa implementacion di SDG-nan cu ta pone enfasis riba implementacion programa, coordinacion institucional, datonan y monitoreo.

Na inicio di e sesion, Raúl Henriquez, Director y Secretario General di SER, a duna bon bini na e invitadonan — na nomber di e presidente den funcion — y a subraya e rol di SER como plataforma pa dialogo basa riba evidencia entre partnernan social, academiconan independiente y organisacionnan di sociedad civil. Segun SER, e reto ta pa haci cu maneho socioeconomico no ta keda solamente un aliniacion teorico cu cuadronan internacional, sino cu e ta ser traduci den mehoracionnan real den loke cuidadonan ta experencia den nan bida di tur dia.

E prome episodio a pone enfasis riba SDG 1 (sero pobresa) y SDG 2 (sero hamber) y a mustra con e metanan aki ta bira visibel den practica na Corsou. Central den e proyeccion tabata e trabou di e Daily Meal Program, cu ta duna cuminda cayente varios biaha pa siman na hendenan den situacion vulnerabel. Durante e discusion despues di e proyeccion, a bira pa esnan presente cla cu pobresa y insiguridad alimenticio no ta un estadistica, sino un realidad diario pa un parti significativo di nos poblacion, caminda personanan di edad mayor ta esnan mas vulnerabel pa falta di suficiente medionan financiero y otro obstaculonan manera exclusion digital, cu ta limita nan acceso na informacion- y servicionan esencial.

E conclusionnan aki ta haci ku e enfoke cu SER a bin ta propaga pa prosperidad amplio (‘brede welvaart’) ta bira indispensabel. Prosperidad amplio no ta mira solamente crecemento economico, sino tambe calidad di bida: siguridad di entrada, oportunidad di salud, inclusion social y participacion den comunidad. Den e perspectiva ei, e agenda di SDG-nan ta yuda pa mara progreso no solamente na indicadornan macro-economico, sino tambe na loke hende realmente ta sinti y experencia den nan bida diario.

SER a expresa su aprecio pa e iniciadornan y partnernan cu a contribui na e iniciativa, incluyendo The Recycled Pirate | Life Awareness & Innovations, Aisvarya Productions y Club17 Curaçao, pa nan aporte den haci practicanan di desaroyo sostenibel mas visibel riba e isla.