Den cuadro di e proyecto di renobacion di e antiguo edificio di Ministerio Publico cu ta forma parti di e trayecto di renobacion y revitalisacion di centro di Oranjestad, dialuna atardi a inicia cu construccion di e studentenflat den centro di Oranjestad, marcando un paso importante den e ehecucion di e proyecto y den e meta pa revitalisa e centro di Oranjestad.
Segun minister Geoffrey Wever, “Gobierno a dicidi riba mi peticion pa traspasa e edificio aki na FCCA bao di e condicion cu FCCA ta converti e edificio aki den un studentenflat di mas o menos 25 apartamento pa studiante y riba e promer piso un espacio pa un restaurant of bar.” El a agrega cu “unabes cu e studentenflat aki keda cla nos lo tin mas o menos 25 studiante ta biba den e centro di Oranjestad, cu lo duna un ambiente completamente nobo na nos centro di ciudad.”
Desde 2022 Minister Geoffrey Wever, FCCA y Universidad di Aruba a yega na un palabracion a base di cual Gobierno di Aruba lo traspasa e edificio di Ex-OM den centro di Oranjestad pa FCCA, y cu FCCA lo renoba e edificio aki den un studentenflat pa asina e studiantenan di Universidad di Aruba por biba den centro di Oranjestad y ta cerca di Universidad di Aruba. Segun FCCA, e proyecto aki ta forma parti di un vision mas amplio pa por reutilisa edificionan existente y preserva nos patrimonio historico. E disponibilidad di vivienda pa studiante den un ubicacion central no solamente ta yuda reduci presion financiero riba e studiante, pero tambe ta crea un ambiente mas stabiel y adecua pa su desaroyo academico y personal.
