Aruba por mira atras na un Carnaval 72 yen di ambiente, cu paradanan colorido y luhoso, y sigur un roadmarch inolvidable cu “The Lizard Kacking.” Di banda di polis, a nota cu e aña aki na Oranjestad tabatin 11 detencion menos, mientras cu na San Nicolas tabatin un detencion mas durante Parada Grandi.
Diasabra pa 11’or di mainta Polis conhuntamente cu SMAC a haci inicio di e Parada Grandi na San Nicolas.
Tabatin 8 grupo, last lap y mas o menos 4500 participante.
Cuerpo Policial a conta cu 110 personal riba pia. Diferente departamento di Polis a traha hunto entre otro Polis Uniforma, ME, Motor Unit, Flex Team, K-9 , Mobile Commando, O.C.C., Planologie, departamento di recherche, Personal administrativo y tambe personal di CEA.
Pa 4:25 di atardi e cabes di e parada a yega Joe Laveist Sports Park y pa 7:20 anochi e last lap a yega su final.
E aña aki a conta cu 4 detencion. Entre otro: no sigui ordo di polis, resisti contra polis, arma blanco (cuchiu y screwdriver), y posesion di droga. Aña 2025 tabata tin 3 detencion.
Di su banda, Unidad Motorisa a informa cu a detene 10 chauffeur bao influencia despues di e Parada Grandi na San Nicolas.
Unidad motorisa a para na diferente punto strategicamente na San Nicolas pa asina por a controla e chauffeurnan prome, durante y despues di parada grandi na San Nicolas.
A controla mas o menos 500 vehiculo di motor y a detene 10 chauffeur pa maneha bao influencia.
Aña 2025 a detene 8 chauffeur.
Pa loke ta e ultimo parada di Carnaval 72, diadomingo pa exactamente 11:00 mainta SMAC conhuntamente cu KPA haci inicio di parada grandi di Oranjestad.
Cuerpo Policial Aruba a conta cu 200 personal riba pia. Diferente departamento di Cuerpo Policial a traha hunto entre otro Polis Uniforma, ME, Motor Unit, K-9 , Mobiel Commando, O.C.C., Flex team, Trafico, planologie, departamento di recherche, personal administrativo y tambe personal di CEA.
Pa 5:46 di atardi e cabes di e parada a yega ex-DOW y pa 8:20 di anochi e last lap yega su final.
Pa 9:44 di anochi den Harbour Arena a kima e Momo y asina Carnaval 72 a yega su final.
Total a detene 25 persona. Detencion tabata entre otro bringamento, no sigui ordo di polis , ofende polis, buracheria, droga , arma blanco.
Aña 2025 tabata tin 36 detencion.
Di su banda, Unidad Motorisa a informa cu a detene 9 chauffeur pa core bao influencia despues di Parada Grandi Oranjestad.
Unidad motorisa a activo riba carteranan di Aruba cu control den trafico dirigi riba maneha bao influencia di alcohol despues di parada grandi di Oranjestad.
A controla prome, durante y despues di parada grandi di Oranjestad.
Por a tuma nota cu a controla varios chauffeur y a detene den total di 9 persona.
Na aña 2025 a conta cu 13 detencion.
