Corte den Prome Instancia di Aruba a otorga un ex empleado di scol Afl. 110.000 na daño inmaterial y a ordena Stichting Katholiek Onderwijs Aruba (SKOA) pa paga un total di Afl. 306.837 na compensacion despues di un accidente serio na trabou cu a tuma luga dia 24 di maart 2022.
E decision, emiti dia 11 di november 2025 y publica recientemente, ta regarda un asina yama “schadestaatprocedure,” un proceso legal den cual corte ta determina e suma di compensacion despues cu responsabilidad a ser estableci caba.
Corte a declara anteriormente na januari 2024 cu SKOA tabata responsabel pa e dañonan sufri pa e demandante, a consecuencia di e accidente. E decision anterior ey a keda sosteni den apelacion, despues di cual no a entrega apelacion di casacion, haciendo e responsabilidad di SKOA final.
Segun e registro di corte, e demandante a sufri lesionnan severo, incluyendo un lesion parcial na su lomba y un brasa kibra cu a rekeri cirugia. Debi na complicacionnan liga na e lesion di lomba, e operacion di brasa no por a tuma luga mesora, loke a conduci na un estadia prolonga den hospital. Despues cu el a sali na april 2022, el a sigui haci rehabilitacion.
Documentonan medico cita den e decision a describi limitacionnan grandi den mobilidad y funcionamento diario, incluyendo forsa reduci den brasa y pia, movemento limita di schouder, funcion di man debilita, problemanan di balans, y presencia di un herida di presion serio cu ta rekeri cuido di herida continuo. Na un dado fase, e tabata ser describi manera completamente dependiente di cuido y no autosuficiente.
Den e fase di compensacion aki, e demandante a pidi pago pa gastonan di rehabilitacion di pasado, gastonan di rehabilitacion den futuro, gastonan di abogado, y dañonan inmaterial, tambe conoci manera “smartengeld.” Corte a tuma nota cu no tabatin demanda di perdida di entrada, ya cu SKOA a sigui paga su salario completo te cu su fecha di retiro na 2025.
SKOA a disputa varios di e articulonan di daño reclama y tambe a pidi pa corte nombra un experto medico, argumentando cu problemanan di lomba anterior y supuesto erornan medico durante hospitalisacion a contribui na e condicion di e demandante. SKOA tambe a señala cu e demandante no a yega na un “situacion di fin medico” ainda, loke ta nifica cu su proceso di recuperacion tabata andando ainda.
Corte a rechasa e peticion pa nombra un experto medico. A haya cu SKOA a trece dilanti e asunto di kehonan di lomba previo sin duna un substansiacion medico adecua. Corte a declara cu SKOA por a consulta su propio consehero medico pa sostene su argumento pero no a logra haci esaki.
Riba e asunto di heridanan di presion desaroya durante hospitalisacion, corte a dicta cu e complicacionnan ey tabata riesgonan previsibel asocia cu estadia prolonga den hospital, particularmente ora un pashent ta bira inmobilisa pa motibo di un accidente. Corte a conclui cu rasonablemente e dañonan aki por ser atribui na SKOA bou di e principio huridico di causa y atribucion den derecho civil.
Corte a enfatisa mas aleu cu un condicion medico final no ta necesario legalmente prome cu otorga daño y perhuicio. E la mustra riba actualisacionnan medico cu ta mustra mehoracion slow pero constante, consistente cu rehabilitacion di lesion di lomba cronico. Tambe a considera e deseo di e demandante pa finalisa e asunto y su edat avansa como motibonan pa no retrasa e proceso di compensacion.
Den evaluacion di e gastonan di rehabilitacion di e demandante te cu september 2025, corte a revisa varios categoria di gasto disputa, incluyendo e gasto di un dunador di cuido na cas, servicio di cuido profesional y fisioterapia na cas. SKOA a cuestiona si algun servicio tabata necesario of suficientemente documenta.
Corte a acepta e argumento di e demandante cu un dunador di cuido tabata esencial despues cu el a sali for di hospital, mirando su inhabilidad pa biba independientemente e tempo ey. Aunke SKOA a argumenta e pago mensual pidi di Afl. 1.500 tabata excesivo compara cu e normanan di salario minimo, corte a dicta cu e rol tabata encera cuido medico na cas enbes di trabou di servicio domestico. Corte a otorga e suma completo pidi pa e periodo di cuido aki.
Otro gastonan relaciona cu rehabilitacion tambe a ser otorga pa gran parti. Corte a haya cu e obhecionnan di SKOA no tabatin suficiente detaye y cu facturanan a ser suministra den e dossier di e caso. Repetidamente a señala cu e argumentonan di SKOA tabata pa gran parti sin base.
Den total corte a otorga Afl. 81.397 den gastonan di rehabilitacion di pasado.
Pa loke ta gastonan di abogado, corte a aplica reglanan di procedura di Aruba cu ta limita e recuperacion di gastonan huridico. Mientras cu gastonan legal rasonabel pafo di corte por ser reembolsa, preparacion y trabou di abogado relaciona cu corte ta ser compensa tipicamente pa medio di e sistema di gasto di procedemento standard. E demandante a pidi reembolso di mas cu Afl. 9.000 na gastonan huridico trempan, pero corte a reduci e porcion compensabel na Afl. 6.000, citando insuficiente claridad tocante tarifanan pa ora y overlap cu trabou usa den procedementonan hudicial despues.
E asunto disputa mas grandi tabata encera gastonan di rehabilitacion den futuro. E demandante a argumenta cu e tabatin mester di fisioterapia continuo pa resto di su bida y a calcula su demanda basa riba tratamento tres biaha pa siman, cu dos sesion cu no ta cubri pa seguro. Su peticion tabata basa riba un expectativa di bida proyecta di 86.3 aña, resultando den un futuro reclamo total di Afl. 218.880.
Corte a acepta cu continuacion di fisioterapia tabata medicamente hustifica pero no a acepta completamente e suma pidi. Na final a otorga mitar di e suma reclama pa futuro rehabilitacion, otorgando Afl. 109.440. Corte a declara cu e caso ta pertenece na e contexto huridico di Aruba y cu e evidencia no ta sostene claramente e necesidad di fisioterapia tres biaha pa siman pa e resto di su bida. Corte tambe a considera cu individuonan di edad avansa naturalmente ta enfrenta aumento di gastonan di cuido di salud cu no ta relaciona cu accidentenan.
E elemento mas notabel di e sentencia tabata e otorgamento di Afl. 110.000 na daño no-material. Den determina e suma aki, corte a considera e severidad di e lesionnan, e proceso di rehabilitacion prolonga y dificil, e perdida di independencia di e demandante, y e impacto a largo plaso riba su bida diario y habilidadnan fisico.
Corte a señala cu e demandante no por a haci su trabou mas como maestro di scol basico, no por a participa den deporte, core auto, haci compras independientemente, of biba sin asistencia pa un periodo significante. Mientras cu su condicion a mehora, el a keda afecta permanentemente y lo no a recobra su salud anterior.
E decision tambe a trata e conducta di SKOA despues di e accidente. Corte a observa cu, banda di un bishita relaciona cu yena un formulario di daño, e organisacion a mustra un envolvimento personal limita y mayoria biaha a ser representa pa abogado huridico durante e procedemento. E director di SKOA, segun informe, a asisti solamente na e audiencia final, expresando lamento pa e situacion di e demandante.
SKOA a argumenta cu su financiamento di gobierno no a inclui provisionnan pa obligacionnan di accidente na pia di trabou. Corte a rechasa e argumento aki, advertiendo cu acept’e lo a move e peso di daño y perhuicio riba empleadonan herida. A pone cu SKOA por a atende e asunto por medio di seguro di responsabilidad, negociacion di presupuesto cu minister di Enseñansa, of door di busca un areglo di garantia cu gobierno di Aruba, mirando cu financiamento di enseñansa ta un responsabilidad di gobierno segun constitucion di Aruba.
Den su decision final, Corte a ordena SKOA pa paga Afl. 196.837 na daño material y Afl. 110.000 na daño inmaterial, ademas di interes legal. Interes riba e dañonan inmaterial lo core for di e fecha di e accidente, 24 di maart 2022. Interes riba e gastonan material lo core for di e fechanan di vencemento di e facturanan relevante.
Corte a confirma tambe cu e adelantonan cu SKOA a paga anteriormente cu ta suma Afl. 40.000 mester ser deduci for di e suma final debe. Mas aleu a ordena SKOA pa paga gastonan huridico na suma di Afl. 450 pa gastonan di Corte y Afl. 9.000 pa compensacion di abogado bou di e sistema di tarifa di corte.
