Ayera riba rednan social, sernan keri a anuncia e lamentable noticia di e fayecimento di Julia Renfro, kende na Aruba ta conoci pa su trabao den corant Aruba Today y Aruba Weekly, y tambe como fotografo.
Ruman homber di Julia, Donnie Renfro, a comparti un post riba rednan social anunciando e fayecimento. “Mi ta tristo pa anuncia e fayecimento di mi ruman muher, Julie Renfro despues di un malesa cortico cu a causa un hemoragia cerebral,” Donnie Renfro a bisa den su post. “Ta bay planea un reunion priva pa famia y amigo cercano.”
Segun su perfil di rednan social, Julia Renfro a traha como creador di contenido pa Aruba Tourism Authority, pa gobierno, pa diferente hotel y medionan di comunicacion. Pa un tempo e tabata hefe di redaccion di Aruba Today, e corant ruman di Bon Dia Aruba. E tambe tabata un liaison pa medionan di comunicacion Mericano, cubriendo noticia na Aruba manera e desaparicion di Natalee Holloway.
Amigonan y famia ta recorda Julia como un persona alegre, caluroso, cu compasion pa animalnan y como un amigo genuino.
Bon Dia Aruba ta manda palabra di condolencia na sernan keri di Julia Renfro. Cu Julia sosega na paz.
