E proceso penal relaciona cu e tiramento fatal di polis riba Ayden C’Jay Lanoy di 19 aña, ta bay drenta un etapa decisivo. Mañan ta bay tuma luga e prome dia di tratamento di e caso cu lo marca e inicio di e proceso final pa trece claridad pa tanto famia di e victima como comunidad. E caso conoci como “Caso Caret,” ta sigui mantene gran interes y atencion den comunidad un aña despues di e evento tragico cu a conmociona Aruba.
Lanoy a perde su bida den oranan di marduga di 9 di februari 2025, despues di a ser tira pa polis durante un intento di detencion den area di Madiki. Segun informenan anterior, oficialnan policial a purba para e vehiculo cu e hoben tabata core, supuestamente pa motibo di un violacion di trafico. Ora cu e no a cumpli mesora, un persecucion a sigui. E situacion a escala despues cu e vehiculo a para den un bario residencial, caminda dos agente policial a los tira riba e auto di Lanoy cu consecuencia cu un bala a alcanc’e.
Despues di e incidente aki Ministerio Publico a lansa un investigacion penal. E investigacion ey a conclui cu e agentenan policial a los 20 tiro durante e confrontacion. E dos agente policial a ser acusa desde e tempo ey di complicidad den homicidio imboluntario en conexion cu e tiramento fatal aki. E decision pa persigui e polisnan a marca un desaroyo significante den e caso y a enfatisa e seriedad cu cual autoridadnan ta tratando e asunto.
E morto di e hoben Arubiano a lanta un debate amplio riba henter e isla. Den e dianan despues di e tiroteo, ciudadanonan a reuni den manifestacionnan pidiendo pa transparencia, responsabilidad y husticia.
Durante e audiencia preliminar (e asina yama “reggiezitting”) cu a tuma luga dia 7 di november 2025, corte a atende varios peticion investigativo di tanto fiscal como defensa. Un parti significante di e discusion tabata enfoca riba imagennan di video y otro evidencia tecnico cu a ser colecta durante e investigacion.
E abogadonan di defensa, entre nan abogado Vito Carlo, a insisti riba importancia di trata e grabacionnan cu precision. El a indica cu den un di e camaranan, e audio y e imagen ta core sincronisa, pero den e otro, e audio ta atrasa, loke por crea confusion riba e momento exacto cu a los e prome tiro, un punto cardinal pa defensa y crucial pa determina si tabatin un tiro di advertencia y den ki momento e tironan a tuma luga.
E peticion di defensa tabata pa haya un informe adicional (proces-verbaal) cu un resumen detaya di loke tanto ta wak como loke ta ser scucha den tur dos camara. Abogadonan di defensa a pidi tambe pa haci un investigacion pa medio di un tercer partido independiente, cu e condicion cu e ta un instancia reconoci y confiabel den e area forensico audiovisual.
Hues a splica cu den e dossier ya tin paginanan cu ta detaya e secuencia di e tironan y e diferencianan den grabacion. Segun corte, esey ta suficiente pa un evaluacion inicial di e evidencia visual. A nota cu segun e standard di investigacion, un discrepancia leve den audio no ta automaticamente altera e conclusionnan, basta cu e fuente principal ta corectamente sincronisa.
Pa e motibo ey, hues a rechasa e peticion pa un proces-verbaal di audio separa. Corte a considera cu e investigacion forensico ta completo pa e etapa aki.
Pa loke ta e peticion pa ekipo di defensa realisa un analisis extenso pa medio di un tercer partido, tanto hues y OM a indica cu ta nan derecho pa hacie, y a indica cu esaki mester ta cla prome cu fecha di tratamento di e caso.
Durante e audiencia preliminar aki tambe a discuti si e materia audiovisual di e suceso lo ser mustra den corte durante e tratamento. Aunke e representante di e famia a expresa preocupacion cu esey por ta traumatico pa e famia, tanto Ministerio Publico como e ekipo di defensa di e acusadonan a insisti cu esey ta un parti esencial pa un tratamento husto y completo. Na final hues a confirma cu e imagen lo ser presenta durante e tratamento di e caso.
Hues a determina cu e tratamento substancial di e caso lo tuma luga durante dos sesion principal. E prome dia di audiencia ta programa pa mañan diabierna 20 di februari. Durante e sesion aki, ta spera cu corte lo analisa e hechonan di e caso profundamente, incluyendo declaracion di testigonan, resultadonan forensico y material audiovisual. Hues lo scucha splicacionnan detaya di fiscal y repasa e pruebanan cu ta forma e fundeshi di e acusacionnan.
E di dos dia di e audiencia lo tuma luga dialuna 23 di februari durante cual fiscal di Ministerio Publico lo presenta su rekisitorio, delineando e conclusionnan di e investigacion y lo presenta su peticion pa sentencia pa e acusadonan. Defensa tambe lo tin e oportunidad pa responde extensivamente, presentando su argumentonan y contesta e interpretacion di e evidencia di e fiscal. Tambe e famia di e victima por eherce su derecho legal pa dirigi su mes na corte, dunando nan un oportunidad pa papia tocante e impacto di e perdida y nan perspectiva riba e caso.
Si ta necesario, corte lo programa un sesion adicional dia 26 di februari pa garantisa cu tur partido ta ser scucha completamente y cu e procedemento ta ser conduci cu e detaye necesario den un caso di e magnitud aki.
Pa famia di Lanoy, e tratamento substancial di e caso ta representa otro capitulo dificil den un proceso cu ya tabata emocionalmente pisa. Durante di e fasenan di investigacion y sesion preliminar den corte, nan a expresa consistentemente nan deseo pa claridad y responsabilidad.
Pa e oficialnan envolvi, e huicio ta un oportunidad pa presenta nan relato di loke a sucede e anochi ey. Nan representantenan legal a argumenta cu e circunstancianan tabata compleho y a evoluciona rapidamente, enfatisando e necesidad pa considera e contexto mas amplio den cual e oficialnan a tuma nan decisionnan.
Na final e corte lo tin e tarea di determina si e uso di forsa tabata legalmente hustifica of si el a crusa e drempel pa conducta criminal.
Caso Caret ta un caso di gran importancia pa sistema hudicial di Aruba. E manera con corte maneha e proceso, evalua e prueba y yega na un decision lo tin impacto riba confiansa publico den estado di derecho. Hopi ciudadano ta sigui e desaroyo di e caso cu gran interes, consciente cu resultado lo tin implicacion pa futuro relacion entre polis y comunidad.
