Ombudsman di Aruba, mr. Sra. Jurima Bryson a wordo eligi como Regional Director for the Caribbean & Latin American Region di e Institucion Internacional di Ombudsman (IOI, the International Ombudsman Institute).
Tabata na juni 2025 cu Bureau Ombudsman a anuncia cu Ombudsman di Aruba a bira miembro di IOI despues di un screenmento extenso door di IOI. IOI ta un organisacion internacional cu ta reuni mas di 200 institucion di Ombudsman den mas di 100 pais. Su meta ta pa fortalece cooperacion, bon gobernacion, transparencia y proteccion di derechonan humano.
Como Regional Director pa Caribe y Latino America, Sra. Bryson lo representa e region aki den IOI. E lo yuda tambe pa promove cooperacion y pa comparti conocemento entre paisnan.
E nombramento aki ta mustra cu e trabou di e Ombudsman di Aruba ta wordo reconoci na nivel internacional. Tambe e ta fortalece e posicion di Aruba den e netwerk mundial di Institucionnan di Ombudsman.
Sra. Bryson ta masha agradecido cu e oportunidad unico aki: “Cu honor mi ta ricibi e bon noticia aki pa mi persona y pa Aruba completo. Hunto cu apoyo di mi team nos a establece un instituto imparcial, independiente y profesional riba nos isla chikito. Ta bunita pa wak cu den e fase inicial ya caba ta haya atencion internacional. E outcome ta cu awor Aruba tin acceso na un netwerk mas amplio y cu nos Institucion di Ombudsman ta wordo reconoci riba nivel internacional. Manera mi ta bin ta haci como Defensor di Pueblo di Aruba, mi lo eherce mi rol como Regional Director pa e region di Caribe y Latino America cu dedicacion.”
