(AFP)—Strea di pop Mericano, Taylor Swift, a gana e premio pa artista global cu mihor benta pa 2025, segun cuerpo di industria IFPI a anuncia diaranson, e di cuatro aña consecutivo y di seis biaha cu el a gana e premio anual aki.
E exito di e cantante a aumenta despues di e lansamento di su album mas recien, “The Life of a Showgirl”, cual a establece varios record di streaming, como tambe e lansamento di un docuserie tocante su gira record The Eras.
“2025 tabata un otro aña historico (pa Swift), stimula pa participacion global tremendo den streaming, formatonan digital y fisico cu e lansamento di su di 12 album…y e documentario di su gira,” IFPI a bisa.
E cuerpo, cual ta representa e industria di musica globalmente, a nota cu Swift awor a gana su top premio anual mesun hopi biaha cu tur otro artista combina durante e ultimo dies añanan.
IFPI a entrega e Global Artist of the Year Award despues di calcula e bentanan mundial di un artista of grupo musical den streaming, download y formatonan fisico durante e aña calendario y ta cubri henter nan cuerpo di musica.
Swift a gana grupo Koreano Stray Kids, cual a keda na segundo luga—su ranking mas halto te awor y e tercer aña consecutivo den e top cinco global.
