AI ta bay transforma sociedad den maneranan radical. Mescos revolucionnan tecnologico den pasado manera e stoommachine, electricidad y telecomunicacion. Despues di un periodo di adaptacion, sociedad ta beneficia masivamente di e innovacionnan den cuestion. E factor importante den tur esaki ta cu e innovacion haya mas hopi acogida cu ta posibel den sociedad, pa asina preveni cu tur e bentahanan ta keda concentra den un grupito chikito. E serie di columna aki “AI pa Pueblo”, ta dedica na e revolucion tecnologico cu AI lo trece, pero cu enfasis riba e hecho cu e mester beneficia full pueblo.

Kico AI por haci pa mi awe?

Pa awo hopi lector lo a tende di AI y su potencial pa sociedad, pero den terminonan practico kico AI, lo por nifica pa mi persona? Nos lo discuti un par di ehempelnan duidelijk den e contexto aki.

Na prome lugar: un Business Plan. Si mi tin un negoshi of mi lo desea di start riba mi mes, mi lo mester di un documento yama un Business Plan. Esaki ta sumamente importante pa un persona tin, por ehempel pa sa kico tur e mester pa su negoshi. Tambe si e kier busca financiamento na banco of otro instituto, ta rekeri cu tin un business plan. Normalmente un Business Plan lo costa un persona porta 2.000,- pa 4.000,- florin. Pa hopi empresarionan chikito esaki simplemente ta un prijs cu nan no por paga. Awo cu e poder AI, usarionan di AI lo por traha un Business Plan rapidamente na prijs nan hopi mas atractivo.

Como di dos ehempel: Preparation di cartanan (juridico) basico. Hopi negoshi lo por tin te maken, cu cuestionnan basico huridico of fiscal. Un experto humano den e areanan aki hopi vez ta cobra rond di 400,- florin pa ora. Cu atrobe no ta un prijs realistico pa hopi empresarionan chikito. Awo si ta casonan huridico basico, cu no ta hopi complica, AI por brinda hopi alivio. Awendia AI lo por yuda prepara e carta y duna un advies basico huridico/fiscal, pa un prijs hopi mas pasabel cu prijs cu expertonan humano ta cobra.

Den e di tres ehempel nos lo toca e tema di Marketing. Pa traha un bon post pa bo negoshi sea riba Facebook, Instagram of TikTok, mester dedica toch wel basta tempo pa pensa y nota tur esaki. Den esaki tambe AI lo por asisti den un manera duidelijk. Automatisando gran parti di e creacion di e posts pa social media. Asina yudando empresarionan chikito cu nan uso di social media.

Prompt Engineering: E Skill di Siglo 21.

Pa hopi e ehempelnan menciona ta zona sumamente interesante. AI awendia por haci A-tot-Z. Pero hopi empresarionan no lo sa con pa cuminsa unlock e poder berdadero di AI. Esaki ta hiba nos na e tema di “Prompt Engineering”, esta con ami mester papia cu e AI, pa asina maximalisa mi resultadonan?

Prompt Engineering simplemente kiermen cu un persona sa con pa usa AI, pa asina yega na e resultadonan cu e ta desea di yega pa su situacion den cuestion. Den e mundo aki, cu lo wordo transforma dor di AI sin duda, con mi comunica cu AI lo no ta un luho cu porta mi lo ta interesa den dje. Pero un skill cu mi lo mester pa mi derecho di existencia den Siglo 21.

En fin, modelonan di AI, bastante poderoso ya caba ta disponibel pa un y tur. Tambe e por haci un diferencia inmenso pa empresarionan chikito rond full Aruba. Dus AI no ta un tema filosofico, pero uno hopi practico cu hopi bentahanan. E skillset di Siglo 21, over con mi comunica cu AI, esta Prompt Engineering ta uno cu eigenlijk tur hende na Aruba mester siña pa asina sigui doe mee cu tur e desaroyonan cu AI por brinda e individual y sociedad.