Awe a tuma luga e prome sesion di tratamento di caso Caret cu ta trata dos agente policial, R. Dirksz y M. Violenes, cu tabata involucra den e tiramento cu a resulta den morto di Ayden Lanoy riba 9 di feburari 2025. E audiencia a atrae hopi interes di publico. E sala principal tabata completamente yena, y corte a habri un di dos sala adicional pa persona por a sigui e tratamento via transmision di video.

Caso Caret ta relaciona cu un incidente cu a socede dia 9 di feburari 2025, ora dos agente policial a los 20 tiro riba e auto conduci pa Ayden Lanoy, un hoben di 19 aña. Un di e balanan a alcansa Lanoy cu consecuencia fatal. E tratamento hudicial ta enfoca riba e uso di arma di candela y e circumstancianan cu a hiba na e decision di tira.

Na apertura di e audiencia, hues a splica con e procedimento lo tuma luga y a enfatisa cu ta trata di un caso pisa y sensibel. El a pidi tur hende presente pa mantene calma y respet durante e sesion. El a indica cu cualkier persona cu sinti cu emocionnan ta bira demasiado intenso por sali for di sala temporalmente y bolbe ora ta mas trankilo.

Hues a repasa e hecho di e marduga/mainta en cuestion, describiendo cu tabata un anochi ocupa pa polis cu diferente incidente rond di isla. E dos agente policial a haya instruccion di pasa dilanti Lekker Restaurant, cu su orario di cierre tabata acercando, pa verifica si tur cos tabata den ordo.

Durante nan ronda den area di Palm Beach, e sospechosonan a nota cu un luz di patras di e auto conduci pa Ayden Lanoy no tabata traha. Segun declaracion, e agentenan a sigui e vehiculo y a activa nan luz pa duna señal pa para. E auto no a para. Nan a usa microphone pa duna instruccion verbal pa stop, pero tampoco no a haya reaccion di e chauffeur.

Na rotonde di Superfood, segun e sospechosonan a indica, e auto inicialmente a mustra intencion di bira banada drechi pa bay direccion Eagle Beach, pero despues a bira back bay direccion Bubali. R. Dirksz a declara cu na e momento ey el a sospecha cu talbes e conductor por tabata bao influencia di alcohol of otro susbtancia, y e decision a ser tuma pa cuminsa un persecuccion.

Segun informacion for di dossier cu hues a menciona, e persecuccion no tabata na velocidad halto. Sospechosonan a indica cu nan no ta corda exacto e velocidad, pero cu nan a aumenta velocidad compara cu con nan tabata core inicialmente. Hues a aclarea cu for di imagennan di camara ta parse cu e vehiculonan no tabata core riba 80 kilometer pa ora.

E agentenan a notifica central di polis rond di 5:10 di mainta cu nan a cuminsa un persecuccion. E persecuccion a sigui te na Madiki Kavel, unda e incidente final a sucede.

Segun declaracion di M. Violenes, ora e auto di Lanoy a yega na un caminda sin salida, e vehiculo a para. El a percibi un luz cendi den auto y a mira silueta di un homber cu movemento. El a baha for di su vehiculo pa acerca e auto, pero despues, segun el a indica, e auto di Lanoy a move y a cuminsa core den su direccion. El a declara cu el a teme cu e auto lo dal e y cu el a sinti su bida den peliger y pa e motibo ey el a saca su arma y tira riba e auto. Durante su declaracion, el a mustra emocion ora el a relata e momento.

R. Dirksz a declara cu ora su colega a baha for di e auto di polis, e tambe a baha. El a scucha sonido di motor y despues a mira cu e auto tabata move den direccion di nan.

Hues a cuestiona repetidamente si tabatin otro alternativa den e momento ey, manera hala na banda pa laga e auto pasa, subi den auto di polis atrobe y sigui e persecuccion, of warda pa wak con situacion lo desaroya. R. Dirksz a sostene cu den su opinion no tabatin otro opcion y cu e decision pa saca arma y tira tabata motiva pa e percepcion di peliger inmediato.

M. Violenes tambe a ser cuestiona si el a considera hala na banda of pensa riba consecuencia di tira. El a responde cu tur cos a pasa hopi rapido y cu ora e auto tabata move den su direccion, e no a pensa di biaha riba consecuencia, sino el a reacciona riba loke el a percibi como un menasa.

Un total di 20 bala a ser tira durante e incidente. M. Violenes a los tres tiro, mientras cu R. Dirksz a tira 17 bala. Hues a puntra cual tabata e motibo y intencion tras di e tiramento. M. Violenes a declara cu el a tira riba e hood di e auto cu meta di para e vehiculo y elimina e peliger cu el a percibi. Hues a cuestiona con tira riba e hood por elimina un menasa, na cual e sospechoso a indica cu su intencion tabata pa reduci velocidad di e auto, reconociendo cu un auto no ta para instantaneamente pa medio di disparo.

R. Dirksz a declara cu el a scucha un tiro pero no tabata sa di unda e tiro a bin. Segun su palabra, el a reacciona tirando. El a indica cu durante e momento di tension el a experimenta un “blackout” y cu ora el a bira bin bij, el a tira tur 17 bala di su arma.

Durante e audiencia, imagennan di camara di seguridad a wordo revisa. Hues a pidi publico pa sali for di sala temporalmente pa asina e por analisa e imagennan cu e sospechosonan, nan abogadonan y mayornan di Lanoy sin presencia di publico. Despues, publico a drenta atrobe y a haya oportunidad di mira e material audiovisual.

Segun hues a splica, dos camara a capta e incidente. Aunke tin audio y imagen, nan no tabata sincronisa. Pa e motibo ey, Landsrecherche a determina cu e evaluacion principal lo basa riba imagennan y no riba audio.

Despues di mira e imagennan hues a splica cu den e imagennan el a mira cu e dos auto a yega na e caminda sin salida, despues e auto di Lanoy a dal un buelta, a para casi pega cu e auto di polis, y despues a reverse un poco. E dos agentenan a baha rapidamente for di nan vehiculo y a tuma posicion cu arma dirigi riba e auto. Segun hues, e prome tiro por a ser observa na minuut 05:15:05 di grabacion, unda huma visibel sali for di un arma.

Segun e analisis presenta, M. Violenes tabata situa mas dilanti e auto, cara pa e hood y a los tira riba e hood, mientras cu R. Dirksz tabata na banda y a cumins alos tira na e parti na banda di e auto y posteriormente tambe na parti patras di e vehiculo. E auto a sigui move te ora cu el a para.

Hues a indica cu for di imagennan ta parse cu e vehiculo no tabata core na velocidad halto. El a agrega cu el a nota un movemento di e auto cu na su parecer ta mustra mas un intento di huy for di situacion cu no un accion dirigi pa dal un agente cu auto.

Segun e sospechosonan, loke nan a experiencia e dia ey no ta completamente cuadra cu loke ta visibel riba video. Nan a indica cu nan percepcion di peliger tabata diferente for di loke e camara ta mustra.

Di e 20 bala cu a ser tira, un bala a alcansa Lanoy. E bala a drenta for di un banda links di su curpa pa e otro y a toca e ader principal, causando sangramento interno cu a resulta fatal. Riba base di investigacion di trayecto di bala y posicion di e agentenan durante e incidente, ta mustra cu e bala cu a alcansa Lanoy probablemente a bin for di arma di sospechoso R. Dirksz.

Mayornan di Lanoy a haya oportunidad di expresa nan dolor den sala. Cu hopi emocion e mama di Lanoy a cuestiona con e agentenan por a tira 20 biaha riba un hoben cu nan no conoce. Cu awa na wowo el a describi Lanoy como un hoben alegre, responsable y cu tabata traha duro pa contribui pa sostene su famia.

Pareha di Ayden tambe a hiba palabra y cu un dolor inmenso a expresa con duro e situacion a afect’e, e shock cu el a pasa aden y con su bida a cambia por completo despues di 9 di februari.

Tata di Ayden a cuestiona con por ta posible cu a tira 20 bala sin sa ken ta den auto of cuanto hende tabatin den auto. Hasta a puntra si e agentenan tabata bao influencia di algo pasobra pa tira 20 bala riba un auto sin sa ken ta aden of cuanto hende tin aden no ta klopt.

Tocante situacion personal di e agentenan policial, ambos a declara cu e incidente tabatin un impacto profundo riba nan bida personal y profesional. Nan a indica cu nan a asisti na sesionnan psicologico varios biaha despues di e incidente, pero mester a stop pa motibo financiero. Nan ta geschorst di trabao y ta ricibi solamente un parti di nan salario ya cu nan ta kita un tercera parti di eskai pa motibo di nan schorsing.

Dialuna 23 di feburari 2025 e tratamento di e caso lo continua. Durante e siguiente sesion, Ministerio Publico y defensa lo presenta nan argumentonan.