(AFP) – Un hues federal a dicidi diaranson cu e politica di administracion Trump di deporta migrantenan indocumenta na paisnan cu no ta di nan ta ilegal.
Hues di districto Brian Murphy a pone su decision riba asina yama deportacion di tercer pais den pausa pa 15 dia pa permiti gobierno entrega un apelacion. “E caso aki ta trata si e gobierno por, sin notificacion deporta un persona na e pais incorecto, of un pais unda e ta probable di ta persigui of tortura,” Murphy a skirbi.
Department of Homeland Security a bisa cu e ta “okay” pa deporta un migrante na un tercer pais si DHS sa cu nan no lo ser mata ora nan yega, segun Murphy. “E no ta bon y e no ta legal,” el a bisa.
E hues a nota cu Congreso a haci politica di Merca pa no deporta hende na paisnan unda nan bida por ta den peligro of nan lo ser tortura. Bao DHS su politica, sinembargo, oficialnan di “inmigracion no mester duna un notificacion of ningun oportunidad di obhecion prome cu nan deporta un persona pa un pais potencialmente peligroso of no familiar,” Murphy a declara.
Un persona por keda deporta si gobierno a ricibi “garantia cu ningun tipo di persecucion of tortura lo sucede aya” el a declara.
“E politica nobo aki – cual ta mustra di para na luga di e proteccionnan cu Congreso a manda – ta fracasa den satisface e proceso pa un cantidad di motibo, pero e problema ta sinta cu ningun hende sa tocante e supuesto “garantianan” aki. Ken nan ta cubri? Dicon gobierno ta categorisa nan como creible? Con cualkier persona por ta sigur cu nan ta existi?” el a puntra.
Murphy, uno nombra pa e presidente Democrata Joe Biden, anteriormente a busca manera di blokia e deportacion di un grupo di migrante di Sur Sudan pero Corte Supremo a blokia e intento, cu e banda conservativo den posicion dominante.
Segun e autoridadnan Mericano, 8 hende homber – 2 di Myanmar, 2 di Cuba y un cada un di Vietnam, Laos, Mexico y Sur Sudan – tabata criminal condena di crimen violento.
E administracion di Trump a defende e deportacionnan aki como necesario desde cu e nacionnan aki y algun di esnan cu ta blanco di deportacion hopi biaha ta nenga acepta nan. Donald Trump a campaña pa presidente cu promesa di expulsa miyones di migrante indocumenta for di Merca, y a tuma un cantidad di accion cu meta di aumenta deportacionnan desde cu el a regresa Cas Blanco.
