Ministerio di Infrastructura a indica cu, paralelo na e proceso di preparacion di un ROPV nobo, ta mira e necesidad pa trata cierto cambio a corto plaso den e reglamentonan actual pa facilita realisacion di proyectonan prioritario.
Actualmente e decreto legal vigente ta limita e posibilidad pa realisa cierto tipo di construccion y instalacionnan, entre otro riba punto di haltura di edificio y uso di tereno. Den cierto caso, e reglamentonan actual no ta permiti solucionnan tecnico cu ta necesario pa e funcionamento di infrastructura moderno, manera fluho, circulacion di proceso y instalacion di utilidadnan, segun un comunicado di gobierno.
Minister di Infrastructura, drs. Rene Herdé a indica cu e cambionan cu ta wordo considera ta di caracter tecnico y puntual y ta dirigi na posibilidad pa implementa proyectonan cu awor no por realisa bao e reglamentonan vigente. E ahustenan aki lo ser trata den e marco dje ley existente y tin como meta pa crea solucionnan practico a corto plaso den e trayectorio pa yega na un ROPV nobo.
Ministerio di Infrastructura a subraya e importancia pa trata e punto nan aki, tumando na cuenta e necesidad pa desaroyo di infrastructura y e interes cu ta hiba na realisacion di proyectonan actual y den futuro.
