(AFP) – Instagram ta bay cuminsa notifica mayornan ora nan yiu adolescente ripitidamente busca contenido relaciona cu suicidio of auto-lesion, doño di e plataforma, Meta a anuncia diahuebs, mientras e compania ta enfrenta presion legal tocante su maneho di usuarionan jong.
E alerta, lansa den proximo simannan na Merca, Reino Uni, Australia y Canada, ta bay ta activa ora un adolescente haci varios buskeda pa terminonan asina den un periodo cortico di tempo.
Ta bay expande e alerta na otro region despues na 2026.
Mayornan usando herment di supervision di mayor di Instagram ta bay ricibi notificacion via e-mail, mensahe di texto of WhatsApp, como tambe door di e app mes, hunto cu recursonan di experto pa yuda nan nabega combersacionnan potencialmente dificil cu nan yiunan.
Instagram ya caba ta blokea buskeda pa terminonan asocia cu suicidio y auto-lesion, dirigiendo usuarionan na numbernan di ayudo y organisacionnan di sosten. E alerta nobo ta diseña pa avisa di casonan unda adolescentenan persistentemente ta purba di haci buskeda asina a pesar di e restriccion.
Meta a bisa cu a consulta cu su Grupo di Conseho tocante Suicidio y Auto-lesion den pone e limite pa alerta, agregando cu deliberadamente a bay pa cautela hasta si esey ta nifica cu lo por manda algun notificacion sin causa genuino pa preocupacion.
E anuncio ta yega mientras e compania ta enfrenta presion legal tocante uso di su plataformanan pa usuarionan jong.
CEO di Meta, Mark Zuckerberg a testigua e luna aki na un huicio historico na California tocante acusacionnan cu su compania y otronan intencionalmente a causa adiccion den menornan di edad – e prome biaha cu un caso asina ta yega un hurado.
Meta tambe ta luchando cu un empuhe global pa restringi acceso di mucha na rednan social, cu Australia prohibiendo esnan menor di 16 aña for di plataformanan na december y paisnan incluyendo Francia, Dinamarca, Spaña y Reino Uni na caminda pa introduci medidanan similar.
