Cambio di clima no ta un menasa leu of abstracto mas pa Aruba y e parti Caribense di Reino. Esey tabata e mensahe central di e discurso presenta pa e activista di clima Oriana Wouters durante e Interparlamentaire Koninkrijksoverleg (IPKO) 2026, cu a tuma luga na Aruba recientemente, caminda el a dirigi su mes na e legisladornan di Aruba, Corsou, Sint Maarten y Hulanda riba e urgencia creciente di adaptacion na clima y e necesidad pa un cooperacion mas fuerte dentro di Reino Hulandes.
Wouters a introduci su mes como un defensor di clima di Aruba y tambe un representante
di e Grupo di Clima y Husticia Social Caribe Hulandes, un red informal pero den expansion cu a surgi despues di un campamento di husticia di clima cu a tuma luga na St. Maarten na 2024. E grupo awor ta conta cu 51 miembro di tur seis isla—Aruba, Corsou, Boneiro, St. Maarten, Saba y St. Eustatius—y tambe miembronan di e diaspora na Hulanda y mas leu.
El a splica cu e grupo ta consisti di biologo, abogado, ingenieronan di energia renobable, expertonan di politica y cutlural, y organisadornan di comunidad, Wouters a caracterisa e miembronan como parti di e siguiente generacion di e parti Caribense di Reino. Nan ta reuni mensualmente, forma gruponan di trabou, comparti experticio y sostene gobiernonan ora nan ser invita, el a bisa, enfatisando cu nan esfuersonan ta dirigi riba fortifica Reino enbes di opone esaki.
Su presentacion a enfoca riba e impactonan real di cambio di clima cu ya ta afecta e islanan. Citando proyeccionnan di e Instituto Real Hulandes di Meteorologia y e Panel Internacional riba Delta y Areanan Costal, Wouters a señala cu Aruba por ta entre 0.8 y 1.3 grado celsius mas cayente pa 2050, cu temperaturanan potencialmente subiendo cu te cu 3.3 grado celsius pa 2100. E temporada di calor, cual antes tabata limita na tres luna, ta ser spera di extende te na siete luna di e aña, aunke residentenan ya ta informa cu nan ta experiencia cinco luna di calor intenso.
E patronchinan di awacero tambe ta proyecta pa cambia significantemente. Na e momentonan aki Aruba ta ricibi alrededor di 500 milimeter di awasero pa aña, pero bou di scenarionan di emision halto e cifra ey por baha bou di 300 milimeter anualmente. Na mesun momento, e nivel di lama rond di e isla por subi cu casi un meter pa fin di siglo.
Wouters a subraya cu e cifranan aki ta traduci den realidadnan di tur dia. Residentenan di edae avansa sin acceso na airco ta enfrenta riesgonan di salud aumenta. Atletanan cu ta hunga partidonan di merdia riba terenonan di yerba sintetico ta bringa cu temperaturanan di superficie extremo. Barionan urbano rond di Aruba, Corsou y St. Maarten a registra temperatura di superficie di tera riba 40 grado Celsius. Rifnan di coral ta sufriendo daño, y playanan ta reduci, poniendo presion riba ecosistemanan y infrastructura originalmente diseña pa condicionnan di clima mas stabiel.
El a referi na e evaluacion di e Indice di Riesgo y Vulnerabilidad di Clima y Oceano pa Aruba, cu a identifica salud di ecosistema cu ta baha, cambionan demografico incluyendo un poblacion cu ta embehece, y e fragilidad di un economia dependiente di turismo como areanan di riesgo clave. Rifnan di coral y mangelnan a ser clasifica como factornan di riesgo halto debi na nan rol protectivo canto di costa y nan conexion cu stabilidad economico. El a indica cu turismo ta representa mas o menos 70% di economia di Aruba y ta sostene mas di 88% di empleo, haciendo degradacion di medio ambiente un preocupacion economico tambe.
Aunke actividad economico por parce fuerte, Wouters a describi cambio di clima como un “efecto di kimamento slow,” comparando esaki cu core un auto sin azeta di motor, e por sigui core pa algun tempo, pero eventual daño ta bira inevitabel. El a argumenta cu adaptacion di clima no ta un debate teorico mas sino un asunto di gobernacion den tempo real.
E presentacion a toca tambe e desaroyonan huridico dentro di Reino. Wouters a referi na e caso di clima recien cu ta encera Boneiro, den cual a argumenta cu articulo 43 di e Statuut ta obliga Reino pa salvaguardia derechonan fundamental, libertadnan, siguridad huridico y bon gobernacion. Di acuerdo cu e resultadonan di corte, proteccion inadecua contra impactonan di clima por constitui un violacion di derechonan humano, incluyendo e derechonan di bida familiar, cultura y no-discriminacion.
El a encuadra vulnerabilidad di clima den Caribe como historicamente forma, señalando cu islanan chikito ta contribui minimalmente na emisionnan mundial mientras nan ta enfrenta impactonan desproporcional. E asunto, el a bisa, no ta tocante di asigna culpa pero tocante responsabilidad comparti dentro di Reino ora derechonan fundamental ta ser menasa pa calor, aumento di nivel di lama, scarsedad di awa y inseguridad di cuminda.
Wouters a subraya retonan structural relaciona cu gobernacion internacional di clima. Como hurisdiccionnan insular sub-nacional, e paisnan Caribense dentro di Reino no ta estadonan miembro independiente bou di e Convencion di Nacionnan Uni tocante Cuadro di Cambio di Clima; Hulanda ta representa Reino den su totalidad. Esaki ta limita e islanan su acceso directo na financiamento di clima, plataformanan di negociacion y mecanismonan di perdida y daño. Participacion, el a bisa, hopi biaha tabata ad hoc, cu representantenan tin biaha ta asisti na conferencianan di clima independientemente of de bes en cuando como parti di e delegacion di Reino.
El a mustra riba colaboracion anterior como un ehempel di kico participacion structura por logra. Durante e presentacion di Reino na Corte Internacional di Husticia tocante obligacionnan di estado riba cambio di clima, miembronan di e grupo a ricibi training rapido den derecho ambiental y internacional, sosteni pa organisacionnan di husticia di clima hubenil y ministerio di Asuntonan Exterior di Hulanda. E compromiso cu gobierno di Aruba y e contribucionnan siguiente di Corsou y St. Maarten a ser describi como pasonan constructivo pa planificacion di adaptacion comparti.
Ademas di boga pa financiamento previsibel y infrastructura di dato mas fuerte, Wouters a propone un ahuste practico di politica. El a sugeri pa revisa e cuadro di fondonan cultural existente di Reino pa asina mitigacion y adaptacion di clima por ser reconoci explicitamente como obhetivonan eligibel. Den e contexto di Caribe, el a argumenta, herencia natural y cultural ta estrechamente intercambia, cu ecosistemanan cu ta sostene tradicionnan di cosecha, pesca y turismo.
Na final di e presentacion, legisladornan a haci pregunta y comentario. Un pregunta a trata e rol potencial di energia nuclear, incluyendo reactornan modular chikito, como parti di e transicion di energia. Wouters a contesta cu experticio riba energia nuclear ta limita riba e islanan y a lanta preocupacionnan tocante maneho di desperdicio y implicacionnan ambiental. El a indica cu mientras cu por considera estudionan di factibilidad, hopi den e grupo probablemente lo opone energia nuclear bou di condicionnan actual.
Otro pregunta a enfoca riba con medidanan di sostenibilidad por alinea cu desaroyo economico. Wouters a reconoce e preocupacionnan cu proteccion di medio ambiente por frena crecemento pero a argumenta cu modelonan di desaroyo tradicional hopi biaha ta exclui gastonan di medio ambiente y salud. El a señala cu mientras cu proyectonan di mitigacion manera energia solar por genera rindimento financiero inmediato, iniciativanan di adaptacion—manera restauracion di rif di coral y mangel—ta duna beneficionan economico indirecto pero esencial door di conserva e apelacion turistico y proteccion di costa.
Como un ehempel di innovacion adaptativo, el a menciona proyectonan di restauracion di “oyster banks” cu por proteha costa, sostene pesca y mehora calidad di awa mientras ta provee balor economico. Iniciativanan asina, el a sugeri, ta demostra cu adaptacion no mester bini na costo di desaroyo pero enbes di esey por sostene resiliencia a largo plaso.
Varios legislador a vocifera sosten pa un mayor participacion hubenil y un interpretacion proactivo di articulo 43 di e Statuut. Wouters a conclui reiterando cu resiliencia den Caribe ta fortalece resiliencia den henter Reino y a boga pa cooperacion structura entre gobierno y expertonan hubenil.
E mensahe tabata cla: adaptacion na clima ta ser mira mas y mas no solamente como un prioridad ambiental pero como un asunto di gobernacion, stabilidad economico y derechonan fundamental dentro di Reino Hulandes.
