Aruba ta na caminda pa celebra 40 aña di Status Aparte y 50 aña di Himno y Bandera, y Parlamentario Xiomara Maduro ta enfatisa cu historia di nos isla mester ser respeta y no cambia pa sirbi interesnan politico actual. Aki e parlamentario ta referi na e movecion di Minister Eman y su ekipo, pa no duna nos Libertador Betico Croes su lugar cu e merece den e celebracionnan proximo.

Betico a introduci Himno y Bandera y a logra Status Aparte

Historia ta papia cla, Betico Croes a introduci nos Himno y Bandera y a logra haya aprobacion di Conseho Insular 16 di maart 1976 pa asina dia 18 di maart 1976 Aruba su bandera bay laira y nos Himno Aruba Dushi Tera resona pa prome biaha den Wilhelmina Stadion. Documenta ta tambe cu Betico Croes a logra Aruba su Status Aparte dia 12 di maart 1983, cu e fecha 1 di januari 1986 pa drenta na vigor.

Mike no por stuf Betico Croes su logronan

Cu awe sr. Mike Eman kier dedica atencion solamente na 18 di maart 1948 ora un peticion firma pa 2.147 Arubiano a keda entrega pa Shon A Eman na Reina Hulandes, pidiendo separacion gubernamental y administrativo pa nos ta “baas den nos mesun cas”, no ta kita afo cu Eman por stuf e logronan di Betico Croes di Aruba su Status Aparte y su simbolonan di identidad.

Betico a rebiba e lucha pa mas autonomia

Historia ta conta nos cu despues di 18 di maart 1948, e lucha pa separacion a muri, y ta Betico Croes tempo cu el a forma parti di AVP di 1967 pa 1971, a bira e cara nobo di e lucha pa autonomia pa Aruba. Despues di bandona AVP y lanta su propio partido MEP na 1971, Betico a sigui e lucha pa mas autonomia cu despues a resulta den un Status Aparte pa Aruba.

Betico a usa fecha 18 di maart pa honra tur politico cu a lucha 

Documentonan di Conseho Insular fecha 16 di maart 1976 ta mustra cu Betico Croes a tuma 18 di maart 1976 como fecha pa inaugura Himno y Bandera, pa asina por brinda respet y honor na politiconan manera Henny Eman, Juancho Yrausquin y Shon A Eman pa nan lucha pa separacion cu a culmina 18 di maart 1948. Betico Croes a mustra un ehempel grandi cu Mike Eman por sigui na bienestar di Aruba.

Mike Eman mester respeta e berdad 

Aruba mester sigui honra su historia cu respet y berdad. Betico Croes su rol den historia no por ser kita cu stuf, ya cu ta Betico a logra cu awe Aruba tin Status Aparte y simbolonan di identidad nacional manera nos Himno y Bandera. Mike Eman ta haci bon na respeta e berdad cu ta ancra den nos historia y memoria.

Nota di redaccion: E articulo aki ta opinion di e autor y no ta representa opinion di Bon Dia Aruba.