(AFP)—For di e macaco mas tristo y mas cute di mundo te na AI cu ta bira mistico… Aki ta bo resumen semanal di noticianan fuera di comun for di tur parti di mundo.
‘Punch’ den curason
Celebridad no solamente ta fascina hende, aparentemente e tambe ta haci magia riba macaconan. Manera Punch, un macaco baby bandona pa su mama y maltrata, y ignora pa otro macaconan den un zoo na Hapon.
Despues imagennan di Punch brasando un peluche pa consuelo a bira viral bao hashtag #HangInTherePunch, cu multitud bishitando Ichikawa City Zoo pafor di Tokyo, hopi cu regalonan pa anim’e.
Benta di su peluche orangutan di IKEA tambe a subi dramaticamente, cabando cu deposito na Hapon y Merca.
Cu asina hopi fanatico nobo, e zoo a mester a crea un “zona restringi” rond di su haula.
Tur e adoracion ta parce di a influencia e macaco su destino. Punch su reputacion a mehora entre otro macaconan, y den e ultimo dianan e ta bao “cuido meticulosamente di dos macaco” y ta “poco poco integrando den e grupo,” e zoo a reporta.
Niun joke di sneeuw
Olimpiada di Invierno a caba, pero e siguiente—of talbes esun despues cu esey—por ta aun mas dibertido. Oficialnan Hapones kier converti pelea di bala di sneeuw—“yukigassen”—den un deporte Olimpico.
“E ta e deporte di invierno mas bieu,” Yuji Ano a bisa, kende a organisa e torneo principal riba isla Hokkaido. “Mucho prome cu skating of ski, hende ya tabata tirando bala di sneeuw riba otro.”
“Ora bo haya un riba bo, e ta haci dolor, pero mayormente ta bo orguyo ta sufri,” Toshihiro Takahashi, un sirbidor publico di 48 aña, a bisa despues di su partido unda e mester a tira e siete hungadornan di e equipo contrario cu bala di sneeuw perfectamente fabrica pa un mashin special.
Pero algun hende mester ser convenci di e merito di e deporte. Puntra polis na New York cu a ser ataca cu bala di sneeuw despues di e tormenta di sneeuw mas grandi den mas cu un decada.
“Varios oficial uniforma a ser golpia den cara cu bala di sneeuw,” un vocero di e Departamento di Polis di New York a bisa AFP, mientras cu culpablenan a publica video online, provocando rabia di comisionado Jessica Tisch, kende a yama nan “bergonsoso” y “criminal.”
Dios sa pakico
Por fabor, purba di mantene bo ‘zen’. Cientificonan Hapones a crea un monk robot alimenta pa AI. Y “Buddharoid” a duna reporteronan algun conseho spiritual ora a present’e na un tempel na Kyoto—no pensa mucho riba esaki.
“Budismo ta siña cu ta importante pa no sigui bo pensamento ciegamente of core sin pensa,” el a bisa den un voz calmante y profundo. “Un manera ta pa calma bo mente y laga e pensamento bay.”
Entrena riba algun di e scritura Budista mas esoterico, investigadornan ta kere cu e humanoide sagrado por “reemplasa algun di e ritual religioso tradicionalmente haci pa monknan humano.”
Algun hende ya a reverti na terapia cu AI pa compania of conseho riba nan bida amoroso, pero awor creadornan di e robotnan ta move den teritorio di diosnan—un androide na Kyoto yama Mindar ya ta predica misa, y un robot Aleman cu mannan iluminando ta duna bendicion den cinco idioma.
