(AFP) – Mientras hombernan arma pa e poderoso narcotraficante Mexicano, Nemesio “El Mencho” Oseguera tabata kima auto y blokea caminda na Mexico den respuesta pa asesinato di nan lider, otronan a sembra caos cu un arma diferente: desinformacion.
Morto di e narco Mexicano mas busca, lider di Cartel Jalisco Nueva Generacion, den un operacion militar diadomingo, a desata un ola di violencia criminal den 20 di 32 estado.
Tambe a desata diseminacion masal di imagen crea pa AI comparti miles di biaha riba rednan social.
E team di fact-checking di AFP na Mexico a analisa un decena di imagen y video falso vincula na e operacion y su consecuencianan cu a keda comparti mas di 38.500 biaha riba rednan social. Un di esnan mas disemina tabata un imagen aereo – traha cu inteligencia artificial – di Puerto Vallarta, e paraiso turistico riba costa Pacifico di estado occidental di Jalisco, mustrando varios edificio na candela.
E hombernan di “El Mencho” si a kima vehiculo y a vandalisa negoshi na e pueblo famoso di resort canto di lama. Pero e daño no tabata di e magnitud cu e potretnan falso tabata mustra.
Magnificando caos
Tras di e mobilisacion digital aki, segun varios analista, tin cuentanan vincula na CJNG di Oseguera.
Alberto Escorcia, un periodista specialisa den rednan social, a identifica tres grupo cu ta disemina informacion falso vincula na e ola di violencia.
“Uno tabata Cartel di Jalisco, magnificando e caos,” el a splica AFP.
Grupo di “oportunista” tambe a participa den e desinformacion, usando nan pa promove puntonan di combersacion di politica nacional y internacional, el a agrega.
Varios di e cuenta “oportunistico” aki ya a keda identifica pa AFP como diseminadornan di desinformacion tocante Mexico y resto di America Latino.
A menasa Escorcia riba rednan social despues cu el a comparti un video unda el a demostra e desinformacion riba plataforma X durante e mainta caotico.
Secretario di Seguridad Mexicano, Omar Garcia Harfuch a bisa cu tin “multiple cuenta” riba rednan social identifica pa su oficina como motornan di desinformacion vincula na e operacion.
“Nos ta bay haci un trabao mas profundo pa haya sa ki relacion nan tin cu e organisacion criminal,” mientras otronan “tabata solamente dedica na desinformacion,” el a bisa den un conferencia di prensa.
Reclutamento
Investigadornan academico tambe a detecta expresion di simpatia pa Oseguera, kende te su asesinato tabata e narco mas busca na Merca, unda gobierno a ofrece un recompensa di 15 miyon dollar a cambio di informacion cu conduci na dje.
“Tabatin un volumen notable y sosteni di publicacion y comentario cu expresion di admiracion, duelo,” y “identificacion aspiracional” cu e capo di droga, segun Valeria Almaguer, sub-director di Seminario tocante Violencia y Paz na Colegio di Mexico.
E grupo aki di investigador, examinando Instagram, TikTok y X, a haya mensahenan cu a lamenta morto di “El Mencho,” compaña pa emoji vincula na CJNG y “narco-corrido,” cantica popular cu ta celebra gruponan criminal.
E simbolonan aki ta coincidi cu hallazgonan di e seminario den un investigacion cu a documenta e existencia di mas cu 100 cuenta riba TikTok dedica na reclutamento y propaganda criminal.
“CJNG ta lidera uso di TikTok como canal di reclutamento y propaganda,” nan a publica den un rapport na april di 2025.
E uso di rednan social pa CJNG pa yena nan rango tambe a keda identifica pa oficina di Secretario di Seguridad. Na maart 2025, despues di descubrimento na Jalisco di un centro di training pa e mafia criminal, e departamento a identifica 39 perfil dedica na recluta hoben, cu TikTok a elimina riba peticion di autoridadnan.
