(Infobae) – Iran tabata preparando diaranson pa revela ken lo bira su lider supremo nobo, despues di bombardeonan di Merca y Israel cu a destrui deposito di combustible y causa candela cu a cubri gran parti di Teheran cu un capa denso di huma.

E organismo religioso encarga pa kies e sucesor di Ali Khamenei — kende a muri poco mas cu un siman pasa durante e atakenan cu a cuminsa e guera den Medio Oriente — a confirma cu a tuma un decision, pero e nomber di e lider nobo ainda no a ser anuncia oficialmente.

“A haci votacion pa nombra e lider y e persona a ser scogi,” Ahmad Alamolhoda a declara, miembro di Assembly of Experts, segun agencia di noticia Mehr.

Alamolhoda a bisa cu secretariado di e asamblea lo anuncia e nomber posteriormente. Otro miembro di e cuerpo tambe a confirma cu a tuma un decision, y un di nan a sugeri cu Mojtaba Khamenei, yiu di e lider anterior, por asumi e cargo.

Entretanto, Israel a emiti un advertencia fuerte indicando cu su forsanan militar no lo duda pa ataca e lider nobo of miembro di e Assembly of Experts cu a reuni pa confirma su eleccion.

E alcance di e ofensiva a keda cla cu dos operacion militar durante anochi: Atakenan contra deposito di combustible den y rond di Teheran, y un atake contra un hotel den centro di Beirut cu tabata dirigi contra comandantenan Irani sospechoso.

Mientras e guera a drenta su di nuebe dia, e Islamic Revolutionary Guard Corps a afirma cu Iran tin suficiente recurso pa continua su ofensiva aereo cu drone y misil den Medio Oriente pa un periodo di te seis luna.

Misilnan avansa

Presidente di Merca, Donald Trump, a bisa atrobe cu e no ta descarta desplega tropa na Iran, pero el a sostene cu e guera ta casi gana a pesar di continuo atake cu misil y drone Irani.

E vocero di e Guardia Revolucionario, Ali Mohammad Naini, a declara cu te awor Iran a usa solamente misil di prome y di dos generacion, pero den dianan binidero lo emplea “misil di alcance largo mas avansa y menos usa”.

Saudi Arabia a intercepta un ola di drone dirigi pa obhetivonan manera barionan diplomatico di Riad; Kuwait a reporta un atake contra tanki di combustible na su aeropuerto internacional; y Baréin a informa cu un planta di desalinacion a ser daña.

Jetnan di combate a ataca cinco instalacion petrolero den y rond di Teheran durante atakenan nocturno, causando e morto di cuatro persona, segun director general di distribucion nacional di producto petrolero di Iran.

Gobernador di Teheran a declara na agencia di noticia IRNA cu distribucion di combustible a ser “interumpi temporalmente” mientras reparacion tabata den curso.

Un nubia scur a cubri e ciudad y holo di candela a keda presente den aire.

Ministerio di Salud di Iran a reporta diaranson cu por lo menos 1.200 ciudadano civil a muri y casi 10.000 persona a resulta herida, cifranan cu no a ser confirma independientemente.

Mientras tanto, e ministerio di Salud di Libanon a informa cu por lo menos 294 persona a muri durante atakenan aereo Israeli den e ultimo siman, un situacion cu a move prome minister Nawaf Salam pa adverti tocante un posible “catastrofe humanitario”.

Entretanto, presidente Trump a presenta e retorno di curpanan di seis soldad Mericano cu a muri den un atake cu drone contra un base militar di Merca na Kuwait siman pasa.