Hulanda no tin intencion pa inverti den Venezuela y tampoco ta sostene e guera cu Iran. Asina Secretario di Estado nobo pa Asuntonan di Reino Eric van der Burg a bisa despues di su prome Conseho di Minister di Reino, como miembro di e gabinete Rob Jetten.
Van der Burg, di VVD, ta hopi familiar cu nos paisnan. E tabata den e comision Parlamentario di Tweede Kamer cu tabata trata Asuntonan di Reino, ademas di a sirbi tambe como Minister pa entre otro asuntonan di inmigracion. Durante su prome conferencia di Prensa como e Secretario di Estado nobo pa Asuntonan di Reino, el a enfatisa cu e gabinete nobo di Hulanda ta kere den Statuut cu ta reconoce cu Reino Hulandes ta consisti di cuater Pais, cu ta inclui e tres municipionan special cu ta cay bao Hulanda. “Ta p’esey mes tambe cu Minister President Jetten a bisa durante su prome conferencia di prensa como lider di e gabinete a enfatisa cu Reino Hulandes ta consisti di cuater pais.”
Den luz di tur e acontecimentonan internacional, Van der Burg ta enfatisa cu Hulanda ta tuma e defensa di e seis islanan den Caribe na serio ya cu segun Statuut ta un di su tareanan. “Hulanda Europeo ta responsabel pa seguridad di tur e paisnan. Nos sa cu tabatin hopi tension cerca di Corsou, Boneiro y Aruba relaciona cu Venezuela y Hulanda ta para pa nan seguridad.” Van der Burg a bisa cu no solamente Hulanda ta percura cu tin militarnan y ekiponan presente, incluso bapor. Pero tambe ta mira posibilidad pa manda mas, “no solamente pa defensa di e islanan, pero tambe por ehempel pa logra un blokeo entre Colombia y Venezuela, den caso cu tin problemanan pa e islanan haya nan comustiblenan. Si ta trata di seguridad economico sinembargo, aki si tin un distincion. Pasobra aki si Hulanda ta responsabel pa economia di e tres municipionan, Boneiro, St. Eustatius y Saba, manera nos ta pa Amsterdam y Maastricht. E tres paisnan Corsou, St. Maarten y Aruba ta autonomo riba e tereno aki. Logico nos ta dispuesto pa traha hunto pa stimula economia, pero ta e gobiernonan di e tres paisnan ey ta finalmente responsabel.”
Mientras cu Hulanda pa awor no ta mira interes pa inversion economico na Venezuela, ta preparando si pa mas intercambio cu otro paisnan Sur Americano. Asina ta cla pa firma e Acuerdo Mercosur, pa mira pa fortifica comercio entre Hulanda y Sur America. “Pero nos tabata semper cauteloso direccion Venezuela, pasobra Hulanda no a reconoce e Gobierno di Nicolas Maduro. Nos ta mira e lider di oposicion como e Presidente electo. Awor ta di observa e desaroyo pero mi no a mira señal, cu mi coleganan (Minister pa Asuntonan Ecconomico y di Asuntonan Exterior) tin intencion pa haci algo cu Venezuela.” Van der Burg a enfatisa cu aki ta unda cu ta diferencia cu Merca, mescos cu ta e caso cu Iran, por ehempel.
Eric van der Burg no a bay mucho den detaye riba e pensamento si Aruba mester desmantela su refineria of no, den luz di e cambionan desde cu Merca a invadi Venezuela. “E asunto di refineria ta un asunto di Aruba mes, su parlamento y pueblo. Hulanda di su banda, ta pendiente pa mira con e desaroyo entre Venezuela y Merca lo ta. Nos a kere cu na momento cu Mericanonan a secuestra Maduro, cu nan lo haci mucho mas na Venezuela. Finalmente nan no a haci mucho mas y a yega na palabracionnan cu e Presidente nobo. Riba e momento aki e ta mustra cu e situacion ta keda asina. Ta cuestion di tempo pa mira con tur cos ta cristalisa.” Van der Burg a agrega cu Merca ta mas activo na otro parti di mundo cu na Venezuela.
Rijkswet
Eric van der Burg por ta nobo como Secretario di Estado, pero e ta kere si cu e palabracionnan cu Aruba a haci cu Hulanda den cuadro di e supervision financiero ta keda vigente. “Mi punto di salida ta cu acuerdo ta un acuerdo y ambos partido mester keda mara na dje. Claro por tin excepcion, pero esey mester palabra un biaha mas cu otro.” E acuerdo riba e ley di Reino di Supervision, sinembargo, tin beneficionan enorme pa Aruba, Van der Burg ta mustra. “E ta yuda cu e capacidad di haya prestamo pa haci inversion na Aruba. Y mas importante, mester haci prestamo internacional pa refinancia e debe di Aruba. Pa esey lo ta miho pa tuma e ley, pasobra e ta nifica un reduccion enorme di e interes riba prestamo, di 6.9 pa 3.4 porciento. Esey ta hopi placa. Claro e ta depende cua prestamo Aruba lo kier refinancia, pero e por nifica scapa entre 60 pa 100 miyon florin na interes. Ami ta haya esey hopi placa.” Van der Burg a bisa cu ta na Gobierno di Aruba pa discuti esaki cu Parlamento, pero e mes ta kere den e ley.
Manera ta conoci, fraccion di MEP a papia di e posibilidad pa bolbe habri discusion riba e proposicion di e rijkswet cu Conseho di Minister di Reino a tuma. E ley awor ta na caminda pa Raad van State pa conseho y despues mester bay e Parlamentonan. Den principio, ya no tin sentido pa bolbe habri e discusion, segun Van der Burg. “Pero, no ta por nada ta manda e ley na Raad van State pa conseho. Mester tuma consehonan cu ta bin di Raad van State hopi na serio. Pues si bin consehonan pa trece cambio den e texto, nos lo mester scucha di Raad van State. Kizas no mester tuma tur e consehonan, pero si mester scucha nan.” En todo caso, e proposicion pa crea otro fondo di inversion basa riba e debe y aki si van der Burg a sera e porta firmemente.
E Secretario di Estado nobo, kende lo bishita Aruba na April, finalmente a bisa cu “mi tin hopi animo pa haci e trabao di mi portfolio”
