Diamars poco prome cu merdia a drenta un informe na Cuerpo Policial di un persona cu a accidenta na De La Sallestraat. Aki tabata trata di un adulto mayor masculino di 74 aña cu no tabata reaccionando. Cu urgencia ambulance y polis a desplega pa e sitio.

A compronde cu e chauffeur tabata biniendo di pabao y lo a bira malo tras di stuur. Esaki tabata supuestamente e declaracionnan di testigonan den e area, segun otro medio di comunicacion a reporta. Segun e testigonan, e vehiculo di e chauffeur a bay den banda robes y despues a cambia pa bay banda drechi. Despues a mir’e ta subi rotonde y ranca dos borchi di trafico. Den su intento pa sali for di caminda, el a dal otro auto staciona.

Na yegada di polis, agentenan a ripara mesora cu e chauffeur no tabata reaccionando y rapidamente a pidi asistencia di ambulance. Segun reportahenan riba red social, personal di ambulance a yega y a haci varios intento pa resucita e victima. Na dado momento a logra haya pulso pero e perd’e atrobe. Hasta despues di 45 minuut tratando e victima den cual a reporta cu a suministra shock electrico na curason y duna medicamento, no por a haya pulso mas.

Dokter Voskuil a presenta na e sitio y ta constata morto di Orlando Edmund Lo-Fo-Sang naci na Surinam 10 september 1951 (74 aña). Segun reportahe tocante e caso, Sr. Lo-Fo-Sang tabata un ex-docente na John F. Kennedy-school y E.P.B.

KPA ta enfatisa cu aki no tabata trata di un morto den trafico mirando cu e chauffeur a fayece pa via di problema di salud y no pa motibo di trafico.

Bon Dia Aruba ta manda palabranan di condolencia pa famia y sernan keri di e fayecido.

Tendencia notable

Den e ultimo aña nos a tuma nota di varios caso den trafico unda chauffeurnan ta bira malo tras di stuur, mas tanto entre adultonan mayor. Na 2025, por ehempel, a registra siete caso unda un chauffeur ta bira malo tras di stuur y ta accidenta, unda tres a sucede den december.

Aunke no ta divulga e causa di enfermedad den e casonan aki, mester cuestiona si kisas temperatura y clima por ta hungando un rol.

Bon Dia Aruba a tuma nota di e tendencia aki specialmente entre turistanan di edad halto, unda a registra varios caso di un adulto mayor birando malo na beach—cu algun di nan fayeciendo como resultado. Den e casonan aki tampoco no a divulga causa exacto di morto, pero a nota si cu mayormente tabata enfermedadnan cu supuestamente a surgi diripiente cual por ta un indicacion cu e enfermedad por ta relaciona cu clima calor.

Sinembargo, e falta den dato oficial ta keda un reto. E falta aki ta limita significantemente e habilidad di ciudadanonan y hasta prensa pa identifica tendencianan of saca conclusion firme. Por ehempel, sin dato oficial, no por identifica si e tendencia di adultonan mayor birando malo tras di stuur ta un tendencia cu ta birando mas frecuente, of si esaki ta trata aki di concentracion di casonan cu ta surgi.

Asina mes, e clusternan aki a crea un impacto fuerte riba percepcion publico, amplificando preocupacion entre residente y poniendo mas atencion riba seguridad di trafico.