Stichting Rancho ta sigui traha activamente pa proteha un parti importante di herencia cultural di Aruba: e tradicion di hunga boto miniatura. Presidente di Stichting Rancho, Clifford Rosa, a splica den un conferencia di prensa recien cu den ultimo añanan e tradicion aki a bay perdi, pero ta spera cu e aña aki por rebiba esaki y atrae mas mucha y hoben pa participa den e actividad.

Rosa a splica cu desaroyo recien den infrastructura a trece cambionan grandi na e espacio unda hende tabata practica e actividad aki, loke a trece un preocupacion no solamente pa e fundacion, pero tambe pa comunidad.

El a sigui splica cu anteriormente tabatin un gazebo cu tabata brinda un espacio caminda no solamente participante, pero tambe publico por a reuni pa practica y disfruta di e actividad di coremento di boto miniatura, pero esaki no ta disponibel mas. E situacion aki, segun Rosa, a crea un necesidad pa mas informacion y tambe pa un impulso pa logra un lugar nobo unda esnan cu ta practica e deporte aki por reuni y sigui cultiva e tradicion.

Segun Rosa, el a compronde cu den e area ta tuma lugar varios iniciativa di embeyecemento cu ta enfoca riba turismo. Autoridadnan, segun informacion cu fundacion a ricibi, ta trahando riba renobacion di varios gazebo rond di Aruba y a asigna fondo pa desaroyo di diferente proyecto. Aunke e iniciativa aki por tin impacto positivo riba turismo, Stichting Rancho kier haya mas claridad riba con e proyectonan ta bay afecta e area di lagoen y playa, un lugar cu e ta considera importante pa e comunidad.

Rosa a indica cu fundacion a haci acercamento pa pidi mas informacion tocante e proyecto cu ta conecta e lagoen cu e beach, cu ta un lugar importante pa comunidad y pa e tradicion di boto. E fundacion kier sa exactamente kico ta e plan y con e desaroyo aki lo beneficia e area y e comunidad.

Na mesun momento, Stichting Rancho ta wak cu optimismo na otro desaroyo, manera e renobacion di e monumento di Piscadornan. E proyecto aki, segun Rosa, ta un señal positivo cu por trece mas atencion y interes pa historia y cultura di e banda ey y ta spera cu e paso ey lo ta principio di mas desaroyo positivo pa comunidad.

Un di e meta principal di Stichting Rancho pa e aña aki ta reanima e club historico cu tabata dedica na evento y desaroyo di actividad boto miniatura. Rosa a splica cu hopi di e miembro original di e club aki lamentablemente a fayece, loke a resulta den menos actividad organisa rond di e deporte y e tradicion.

E meta di e fundacion ta pa explora con nan por motiva hende nobo, y tambe hobennan pa drenta den e organisacion y activa e club un biaha mas pa crea mas actividad y oportunidad pa practica y traspasa conocemento di boto miniatura.

Rosa a enfatisa cu aunke Stichting Rancho ta involucra den varios iniciativa, e mision principal di e fundacion ta pa conserva e herencia cultural intangible di Aruba.

El a remarca cu den e ultimo añanan tambe interes di scolnan cu ta pidi Stichting Rancho pa duna presentacion y informacion tocante herencia cultural a aumenta. Segun Rosa, e fundacion ta mira esaki como un oportunidad importante pa educa e generacion hoben.

El a enfatisa cu lamentablemente tin cada biaha menos interes entre mucha y hobennan pa actividadnan relaciona cu lama, manera hunga cant’i lama, of hunga boto, cual ta importante pa forma e prome paso pa muchanan drenta den contacto cu un boto di bela.

Rosa a splica cu e experiencia inicial aki ta importante pasobra e ta duna mucha y hobennan conocemento basico tocante nabegacion.

Den statuto di Stichting Rancho ta stipula cu e organisacion mester conserva diferente aspecto di herencia cultural di Aruba. Un parti importante di esaki ta e historia di piscadornan. Den pasado, hopi piscadornan Arubiano tabata sali lama cu boto di bela pa bay pisca, un ofishi cu pa hopi aña tabata fundamental pa e comunidad.

Segun Rosa, e ofishi aki tambe ta bayendo atras, loke ta haci cu iniciativanan pa conserva tradicionnan maritimo ta bira aun mas importante. Actividadnan manera curso pa traha boto miniatura y otro evento relaciona cu lama ta forma parti di e esfuerso pa mantene e conocemento aki bibo.

Stichting Rancho lo cuminsa e serie di actividadnan pa e aña aki riba 18 di maart. Durante e luna di april tambe tin diferente programa planifica, incluyendo preparacion di material informativo cu lo ser presenta na scolnan rond di Aruba. E meta ta pa aumenta conocemento y interes entre mucha y hoben tocante e tradicion di boto.

Un otro evento importante riba kalender ta Aruba International Regatta, cu ta tuma lugar mitar di aña. Organisadornan ya a cuminsa traha riba preparacion di e competencia, cu tin como meta principal motiva hoben pa haya mas interes pa nabega y participa den deporte di boto di bela.

Rosa a splica cu e aña aki e competencia di boto miniatura lo tin un significado special. E careda principal lo ser nombra Alejandro “Lee” de Windt como un reconocemento na su contribucion como un baluarte den conservacion y practica di e herencia cultural di boto miniatura. Rosa a splica cu e reconocemento aki ta un forma di honra un persona cu pa hopi aña a dedica su bida na mantene e tradicion bibo.

“Hunga boto miniatura ta parti di nos herencia cultural intangible y nos mester di baluartenan cu por pasa e conocemento aki pa siguiente generacion,” Rosa a bisa.

Por ultimo Rosa a haci un yamado directo na hobennan di Aruba pa participa den e evento y actividad di boto miniatura. Segun Rosa, participacion di e generacion nobo ta esencial pa cu e tradicion por sigui existi. E evento di 18 di maart lo ser celebra bao di e tema di 40 aña di Status Aparte di Aruba y 50 aña di Himno y Bandera. E actividad lo tuma lugar na Governor’s Beach, unda participante y publico lo por reuni pa celebra e tradicion y mustra apoyo pa e iniciativa cultural.