Corte den Prome Instancia di Aruba a entrega tres sentencia cu ta envolvi Princess Leisure Aruba V.B.A. y tres banco local, enfatisando e tension entre e obligacionnan di maneho di riesgo di institutonan financiero y necesidad practico pa negoshinan haya acceso na e sistema bancario.
Den decisionnan emiti dia 5 di februari 2026, publica recientemente, corte a rechasa dos di e demandanan di e operador di casino pero a dicta parcialmente na su fabor contra un otro banco, ordenando esaki pa haci un investigacion di diligencia debido di cliente.
E casonan a surgi despues cu Princess Leisure Aruba, parti di e grupo internacional di Princess cu ta opera casino, hotel y restaurantnan mundialmente, a purba di sigura un cuenta bancario local pa e casino. E casino a habri na juli 2025 bao di un areglo di cooperacion cu Natura Development N.V., cu ta posee e licencia emiti pa gobierno pa opera weganan di placa na e hotel.
A pesar di a habri su portanan pa clientenan, e compania a lucha pa haya un relacion bancario na Aruba. Peticionnan pa tres diferente banco local a keda rechasa den diferente fase, loke a pone cu Princess a busca orden di corte di emergencia cu ta obliga e banconan pa sea habri un cuenta of por lo menos haci e investigacion di cliente legalmente rekeri.
E disputa ta ilustra e retonan operacional cu companianan cu no por haya acceso na servicio bancario ta enfrenta. Di acuerdo cu e registro di corte, Princess a argumenta cu sin un cuenta di banco local e tabata enfrenta problemanan practico serio, incluyendo paga empleadonan y huur y cumpli cu obligacionnan di belasting. E compania a bisa cu e pagonan aki mester a ser haci den efectivo, cual el a describi como insigur y indeseabel pa un operacion di casino.
E casino ta ser opera pa Princess bao di un areglo contractual cu Natura, e doño di licencia oficial. Gobierno a otorga e licencia di casino na Natura na october 2023, loke ta rekeri pa e casino ser maneha pa un persona natural aproba pa minister di Husticia y cu cualkier acuerdo di operacion mester ser entrega pa aprobacion di gobierno.
Princess a habri e casino dia 26 di juli 2025 despues di a ricibi aprobacion di minister pa e operador di casino y confirmacion cu e contrato di casino entrega pa Natura no a lanta ningun obhecion.
No obstante, e falta di un cuenta di banco a bira un asunto urgente. Natura a informa Princess na december 2025 cu e no por sigui acepta pago di huur cash pa tempo indefini y a pidi e operador di casino pa transiciona pa transferencia bancario pa 31 di januari 2026.
E banconan a argumenta cu casinonan ta ser considera clientenan di riesgo halto pa motibo di e potencial pa labamento di placa y e volumennan grandi di placa cash cu ta tipicamente envolvi den nan operacionnan. Instancianan financiero na Aruba tambe ta mara na legislacion estricto contra labamento di placa cu ta exigi un debido diligencia mehora pa clientenan di riesgo halto.
Caribbean Mercantile Bank a conduci un revision di diligencia debido mehora prome cu a nenga e peticion di cuenta. E banco a cita preocupacionnan incluyendo cobertura negativo di medionan di comunicacion cu ta envolvi e doño beneficiario final di e grupo, preguntanan tocante e structura legal bao di cual Princess tabata opera e casino, y politicanan interno cu ta permiti cuentanan di casino solamente pa doñonan di licencia.
Aruba Bank a expresa preocupacionnan similar. Den corespondencia presenta na corte, e banco a señala cu casinonan ta ser considera como di riesgo halto pa regulador y banconan corespondiente y a argumenta cu acepta Princess como cliente por menasa su relacionnan cu banconan partner internacional. E la referi tambe na asuntonan di cumplimento di pasado cu ta involucra un director anterior di Princess y acusacionnan publico conecta cu e doño di e grupo.
Otro factor cu e banconan a trece dilanti tabata encera alegacionnan historico tocante e doño beneficiario final di e grupo. Un revision di reputacion prepara pa e firma investigativo Kroll a analisa acusacionnan di labamento di placa y evasion di belasting di decadanan bieu liga na operacionnan di casino na Turkia durante añanan 1990. Sinembargo, e informe tambe a señala cu no tabatin investigacionnan criminal actual of sancionnan contra e individuo.
Den tur tres caso corte a enfatisa cu banconan generalmente tin e libertad pa dicidi cu ken nan ta haci negoshi. Sinembargo, e libertad contractual ey no ta ilimita. Como cu banconan ta hunga un rol central den bida economico, nan tin un deber special di cuido pa cu tercer partidonan cu ta depende di servicio financiero pa participa den sociedad.
Corte a señal cu ta ampliamente reconoci cu opera un negoshi sin acceso na un cuenta di banco ta sumamente dificil. Na mesun momento, institutonan financiero mester cumpli cu reglanan contra labamento di placa y por nenga clientenan ora nan ta hustifica pa preocupacionnan di integridad of cumplimento. E balansa entre e interesnan aki mester ser evalua riba un base di caso pa caso.
Den e caso contra Caribbean Mercantile Bank, corte a dicta cu e banco tin motibonan legitimo pa nenga Princess como cliente.
Hues a conclui cu e banco a conduci un proceso di diligencia debido mehora y a identifica varios riesgo di integridad potencial. Entre nan tabatin incertidumbre tocante si e areglo operacional entre Natura y Princess a ricibi aprobacion completo di minister y preguntanan tocante Princess su transparencia ora di duna informacion durante e proceso di aplicacion.
Corte a haya tambe cu Princess no a demostra convincentemente cu tur otro banco riba e isla definitivamente a nenga di habri un cuenta pa e compania. Evidencia a mustra cu Banco di Caribe a rechasa e peticion pero cu ainda Princess tabata sperando e resultado di un peticion pa reconsideracion, lagando habri e posibilidad cu ainda e compania lo por haya un relacion bancario otro caminda.
Corte a dicta cu e interes di e banco pa evita riesgonan potencial di integridad y reputacion a surpasa e interes di Princess pa obtene un cuenta. E demanda a ser rechasa y Princess a ser ordena pa paga e gastonan legal di e banco.
A yega na un conclusion casi identico den e demanda contra Aruba Bank. Corte a determina cu e banco a investiga Princess suficiente y no a haci un nengamento categorico ilegal.
Aruba Bank a pidi documentacion adicional di e operador di e casino, incluyendo prueba cu otro banconan a rechasa su aplicacionnan. Princess no a provee tur corespondencia pidi, loke e banco a interpreta como un falta di transparencia y un potencial bandera cora.
Mas aleu corte a acepta cu e banco por a cuestiona rasonablemente e structura huridico bao di cual e casino tabata ser opera, ya cu e documentonan di aprobacion di gobierno entrega no tabata confirma claramente cu e acuerdo di cooperacion entre Natura y Princess a ser aproba.
Hues a conclui cu Aruba Bank su interes pa preveni riesgonan di integridad y daño na reputacion a surpasa e necesidad inmediato di Princess pa un cuenta y a nenga e peticion pa obliga e banco habri un cuenta of haci un investigacion nobo.
E resultado tabata diferente den e caso contra RBC Royal Bank. Contrario na e otro banconan, RBC a nenga e peticion di cuenta mesora riba e base cu casinonan a cay pafo di su “apetit di riesgo,” sin prome haci un investigacion di cliente.
Corte a haya cu e nengamento general aki tabata inaceptabel ya cu ley ta rekeri banconan pa evalua cada cliente potencial individualmente y pa haci debido diligencia prome cu dicidi si mester establece un relacion.
Hues a dicta cu nenga henter un categoria di cliente sin investigacion ta igual na un exclusion categorico impermisibel. RBC a haya orden pa cuminsa cu un investigacion di cliente denter di dos dia di trabao despues di e sentencia y pa completa esaki dentro di seis siman despues di a ricibi e informacion rekeri for di Princess.
Sinembargo Corte a nenga di ordena RBC pa habri un cuenta bancario automaticamente despues di e investigacion. Hues a bisa cu tabata imposibel pa determina di antemano si por surgi motibonan legitimo pa nengamento durante e proceso di debido diligencia.
E decisionnan ta reafirma cu banconan ta retene discresion significante pa nenga clientenan ora ta hustifica pa preocupacionnan di integridad of regulacion. Na mesun momento, institutonan financiero no por depende solamente riba clasificacionnan di riesgo general pa nenga servicio; nan mester haci un investigacion apropia den e circunstancianan di cada cliente potencial.
Mientras tanto, corte a señala cu e casino a logra sigui opera door di procesa algun pago a traves di companianan afilia den exterior y usando transaccionnan cash localmente, aunke e areglo ta leu di ta ideal pa un negoshi di su tamaño.
