Den e ultimo dianan, varios ciudadano na Aruba a acudi na rednan social pa expresa nan frustracion tocante estado di diferente careteranan riba isla. E discusion a surgi despues cu algun residente a observa cu trabou di mantencion y reparacion ta ser haci riba cierto careteranan cu, segun nan, ta parti di e ruta cu Su Mahestad Rey Willem-Alexander lo pasa durante su bishita oficial na Aruba e luna aki.
Su Mahestad Rey Willem Alexander lo ta na Aruba pa participa den diferente actividad oficial relaciona cu celebracion di importante aniversario nacional, incluyendo 40 aña di Status Aparte y 50 aña di Himno y Bandera di Aruba. E bishita ta ser considera un evento importante pa isla, cu preparacionnan tumando lugar pa ricibi e monarca.
Sinembargo, riba Facebook, varios usuario ta bisa cu e rapidez cu cual algun caretera ta ser drecha awor ta crea pregunta entre ciudadano. Segun e comentario nan, careteranan cu e Rey lo pasa riba nan ta ricibi mantencion rapido, mientras hopi otro caretera riba isla, cu pa tempo largo ta den mal estado, ainda no a ser drecha.
Den varios grupo y pagina riba Facebook, residente ta comparti potret di buraco y careteranan kibra den nan bario. Pidiendo atencion di gobierno y DOW pa drecha e careteranan. Hopi comentario ta expresa frustracion cu e problema aki no ta nobo.
“Nos ta kehando di e buraconan aki pa mas cu dos aña caba. Pero awor cu Rey ta bin, diripiente tur cos ta move lihe. Pero no na nos bario,” un usuario a comenta riba Facebook.
Otro residente a bisa cu e situacion ta mustra cu prioridad no semper ta basa riba necesidad di ciudadano. “Mi no tin nada contra Rey Willem-Alexander, pero careteranan mester ser drecha pa pueblo tur dia, no solamente ora tin bishita oficial,” e comentario a bisa.
Algun usuario tambe a señala cu tin caretera cu pa hopi tempo ta crea problema pa chauffeur. “Algun caretera e buraconan ta asina cu bo tin cu break y casi para completo pa no cay den buraco fuerte y daña bo auto. Hopi hende a kibra suspension di auto caba. Pero pa esakinan niun hende ta move lihe,” un residente a skirbi.
Den e mesun discusionnan, algun usuario a menciona cu reparacion rapido di careteranan cerca di ruta oficial ta creando percepcion cu gobierno ta concentra riba aparencia y no ta brinda atencion na e necesidadnan real di pueblo. “Ta manera cu solamente unda Rey lo pasa ta ser drecha. Fuera di esey, hopi caretera ainda ta yena di buraco,” un usuario a indica.
No obstante, no tur reaccion riba Facebook ta negativo. Tin usuario cu ta bisa cu cualkier mehoracion di caretera ta positivo, sin importa e razon. “Si finalmente nan ta drecha algun caretera, esaki ta bon pa tur hende. Ohala nan sigui cu e mesun ritmo pa tur bario despues,” un residente a comenta.
E tema di mantencion di careteranan regularmente ta surgi den combersacion publico na Aruba, specialmente ora periodo di awasero empeora e condicion di asfalt y ta crea mas buraco.
Algun chauffeur a comparti cu e estado di careteranan ta afecta nan diariamente. Segun nan, reparacion di vehiculo ta bira un gasto extra pa hopi famia. “Shock y suspension ta kibra mas lihe door di e careteranan kibra. Esaki ta costa placa pa tur hende cu tin auto,” un usuario a comenta.
Varios usuario tambe a trece dilanti cu mayoria ciudadano ta paga impuesto di vehiculo, y mester haci esaki na tempo pasobra sino ta cobra boet si paga laat, pero a pesar di esaki toch tin mucho hopi caretera den mal estado. Nan ta cuestiona pakico nan ta paga impuesto si toch no ta drecha e careteranan.
Aunke gobierno a anuncia programa di mantencion di careteranan, percepcion entre algun ciudadano ta cu progreso no semper ta visibel den tur bario. Esaki ta contribui na frustracion cu ciudadanonan ta expresa a traves di rednan social.
Mientras tanto, preparacionnan pa e bishita di Rey Willem-Alexander ta sigui avansa, cu diferente institucion y organisacion coordinando actividadnan oficial cu lo tuma lugar durante su estadia na Aruba.
Pa hopi ciudadano, e discusion riba Facebook ta refleha algo mas amplio cu solamente un bishita oficial. Pa nan, e tema principal ta prioridad: con y unda mantencion di infrastructura ta ser implementa, y comunidad ta ricibi mesun nivel di atencion.
Mientras e combersacion online ta continua, residente ta sigui comparti experiencia y opinion tocante e condicion di careteranan riba isla. Y pa hopi hende, e mensahe ta cla: caretera bon no ta solamente importante ora tin bishita special, pero durante henter aña pa seguridad y bienestar di tur ciudadano.
