Gobierno di Aruba a reduci su debe na e sistema di banco domestico di manera significante durante e ultimo añanan. Esaki, segun medionan local, ta evidente for di cifranan cu ta representa e gobierno su posicion financiero.
Den 2022, gobierno su debe na Banco Central y banconan comercial tabata yega un total di 353 miyon florin. Den 2023, e suma aki a disminui pa 234 miyon florin y den 2024 na net un poco mas cu 208 miyon florin. Den 2025, e debe a baha mas ainda te na net menos cu 56 miyon florin.
Pa comienso di 2026, e cifra aki a mehora atrobe. Segun e cifranan, den januari solamente 4.8 miyon florin di debe a keda.
Na mesun tempo, un cantidad creciente di placa di gobierno ta den cuentanan na Banco Central. Na fin di 2022, gobierno tabatin mas di 24 miyon florin den su cuenta. Pa fin di 2025, e cantidad aki a aumenta te na mas di 247 miyon florin. Den januari di 2026, e cantidad lo a yega te casi 254 miyon florin.
E cantidad total cu gobierno tin den banconan den e pais tambe a aumenta. Esaki a aumenta cu casi 70 miyon den 2022 te na casi 296 miyon florin den 2025 y mas di 301 florin den januari di 2026.
E cifranan aki ta demostra cu gobierno su posicion di likides a cambia di manera significante den añanan recien. Mientras cu gobierno te ainda tin un posicion di debe substancial den e sistema monetario di 2022, e posicion aki a practicamente disparce.
Na mesun tempo, e gobierno su posicion total cash a crece for di 199.2 miyon florin den 2022 te na 461.5 miyon florin na fin di 2025 y 512.5 miyon florin den januari di 2026.
