Diahuebs ultimo, Defensa y Damen Workboats a firma un contract pa e construccion di 3 boto nobo di patruyahe di tamaño mediano pa Wardacosta Caribe Hulandes.

E contract aki a keda estableci siguiendo un procedura di destaho. E cutternan nobo aki lo reemplasa esnan cu tin actualmente den Caribe, cual tin mas di 20 aña den uso. Ta anticipa cu e cutternan nobo aki lo ta operacional den cuminsando di 2029.

E cutternan cu defensa a cumpra pa Wardacosta lo ta responsable pa entre otro vigilancia, detencion y asistencia maritimo riba lama den e parti Caribense di Reino. Esaki ta inclui tareanan d polis, control di frontera, patruyahe y operacion di busckeda y rescate riba lama.

Botonan mas grandi y moderno pa Wardacosta

E cutternan actual, Jaguar, Panter y Poema a drenta den servicio fin di añanan 1990. E botonan aki di Damen di e marca Stan Patro 4100 ta haciendo trabaonan confiabel pa varios aña caba. Sinembargo, debi na nan edad, mantencion y gastonan ta keda crece. Pa e motibo aki lo reemplasa nan cu un generacion nobo di botonan di patruyahe.

E cutternan nobo di e marca Stan Patrol 5009 ta aproximadamente 50 meter largo, cual ta haci nan mas grandi cu esnan cu tin actualmente. E dato aki ta importante debi na e condicionnan cu algun biaha ta extremo riba lama di Caribe. E botonan nobo aki tambe lo ta ekipa cu sensornan moderno, manera radar avansa y camaranan infracora, cual ta camaranan cu ta detecta energia di calor emiti pa tur obheto riba 0 y ta converti esaki den imagennan visible. Na diferencia di camaranan normal, nan ta opera den scuridad tota of huma y esaki ta haci nan esencial pa seguridad y na su turno extremadamente util pa tin riba e cutternan.

Tur esaki ta duna e tripulacion facilidad pa mantene un vigilancia efectivo te hasta durante oranan di anochi of na momentonan unda visibilidad no ta mesun bon. Na su turno, esaki por aumenta e efectividad operacional di Wardacosta, cual ta fortalece su habilidad di por ehecuta su tareanan.

Botonan cu ta intercepta mas grandi y mas lihe

Banda di e cutternan, Damen lo provee tambe 4 boto nobo pa intercepta. Cada cutter lo tin un di e botonan aki a bordo.

E botonan aki, a diferencia di e cutter, ta destina pa intercepta botonan cu tin contrabanda di manera lihe, e asina yama ‘go-fast’. E go-fastnan hopi biaha ta usa pa transportacion di droga den Caribe, y esaki ta haci e presencia di botonan destina pa intercepta di importancia critico.

Ademas di esaki lo tin un boto pa interceptacion extra disponible pa rotacion di entrenamento y na momento cu algun di esnan abordo mester di mantencion.

E botonan nobo aki lo ta mas grandi cu esnan cu tin actualmente y pa e motibo aki lo mantene velocidad di miho manera den e olanan halto.

Cu e yegada di e cutter y botonan pa intercepta, Wardacosta ta adkiriendo ekiponan moderno cu ta adapta di un miho manera na su tareanan.