E relacion entre Merca y Hulanda den combati traficacion di droga den region a drenta un normal nobo. Mester yega na un acuerdo nobo con ta sigui cu e colaboracion pa combati traficio di droga den awanan territorial y mas den lama Caribe.

Asina comandante suplente di Forza Naval Hulandes den Caribe (Commandement der Zeemacht Caribisch Gebied, CZMCarib), Colonel Frank Ramakers, a bisa durante un presentacion di e defensa y siguridad cu ta brinda na Aruba.

E presentacion tabata uno general, similar cu locual a informa Su Mahestad Rey Willem-Alexander durante su bishita na Marinierskazerne. Manera ta conoce, Su Mahestad a bishita e facilidadnan di Marinierskazerne unda ela keda transporta pa e bapor di Marina Real, Friesland, cu ta patruyando nos awanan. Aki a duna Rey Willem Alexander informacion mas detaya riba e pasonan cu Defensa Hulandes, esta Caribisch a tuma pa percura pa siguridad di e islanan den Caribe.

E mision di e CZMCarib ta pa proteha e parti Caribense di Reino, y contribui na stabilidad y siguridad di e region. E tarea principal ta pa proteha integridad soberano y interesnan vital di e seis islanan, promove y mantene ley internacional y stabilidad y sostene autoridadnan civil di e islanan.

Mayoria di e personal di Defensa den Caribe ta mariniernan, pero tambe tin unidad di ehercito.

E unidadnan, cu pa gran parti ta consisti di mariniernan, ta organisa pa cumpli cu e tarea principal, y tambe permiti nan ehecuta e trabou pa e otro dos tareanan. E tarea pa brinda asistencia civil ta inclui e ayudo durante e temporada di horcan; asistencia na e cadena hudicial, incluso buskeda y cuido di e prison na St. Maarten; y tambe asistencia regional, manera tabata e caso despues di e horcan Melissa, unda a brinda sosten na Jamaica.

Ehecucion di tratadonan ta encera entre otro colaboracion cu Wardacosta Mericano den e lucha contra traficacion di droga. “Nos ta haci esaki e trabou bou coordinacion di e Joint Interagency Taskforce South, ubica na Key West. Aki ta persigui botonan riba lama, ta detene e tripulacion y ta confisca e droga. Despues ta traspasa e detenidonan y droga pa autoridadnan Mericano.” Tin personal di Wardacosta riba Friesland ora ta haci e trabounan aki. “Nos tin mas di 30 aňa ta haci e trabou aki hunto. Den e prome mita di 2025 nos a logra confisca 18 mil kilo di droga ilicito.”

Sinembargo, e movecion di Merca pa ehecuta su operacion nacional ‘Southern Spear,’ a trece modificacion na e colaboracion aki. “E accion aki a traduci su mes na mas unidad militar Mericano dirigi na combatimento di traficacion di droga, pero tambe contra e regimen di Maduro. Na e momentonan mas crucial, tabatin entre 10 pa 15 mil tropa Mericano den region, sosteni pa un cantidad grandi di bapor ademas di asina yama aircraft carrier Gerald Ford. “Esaki tabata un operacion nacional di Merca. No a informa Defensa Hulandes tampoco di e accion.

Locual tabata bon ta cu ningun momento, nan a drenta den e teritorio di Reino Hulandes.”

Yamativo ta cu e traficacion di droga a cambia di ruta, pero no a mengua. Es mas, e traficacion di droga pa Merca y Europa a continua. Ademas, pa motibo di e tension entre Merca y Venezuela, Defensa Hulandes a tuma e decision pa e bapor ‘Friesland’ asumi rol defensivo pa e islanan ABC y dor di esey no a continua cu e trabounan pa intercepta contrabanda di droga. “Nos ta purba si pa sigui e trabounan contra traficacion di droga den awanan teritorial.”

Con ta sigui traha cu Merca ta depende di combersacionan cu mester tuma luga awor. Pasobra, e decision di Merca pa mata traficadornan no ta algo cu Hulanda ta reconoce como pasonan legal. “Nos ta den un normal nobo. Awor nos mester determina kico e normal nobo lo ta.”

Cos ta mustra trankilo, pa awor

… a bisa cu for di e momento ta mustra cu cos ta mas trankilo. “Nos sa cu Merca a enfoca riba tres pilar, cu ta stabilidad di gobernacion, economia cu ta inclui restoracion di e produccion di petroleo y finalmente pa reestablece democracia. Mester bisa bon cla si cu durante accionnan Mericano, no tabatin ningun menasa pa siguridad di e paisnan Hulandes den Caribe. Nos ta hopi alerta si pa cualkier cambio.”

Es mas, for di Augustus di 2025 a trece cambio den maneho, unda a amplia e patruyanan dilanti islanan ABC. “Nos tabata prepara pa fluho di refugiado, incluso si mester a sera espacio aereo.” En todo caso, a sigura cu defensa pa cualkier situacion.

Sinembargo, aunke cu Merca a interveni na Venezuela, e posicion di Defensa Hulandes ta keda hopi skerpi, pasobra no tin e impresion cu mucho cos a cambia na Venezuela. “Pero nos no ta experiencia ningun menasa directo contra e islanan ABC, pero ta prepara pa e ‘worst case scenario y tambe otro crisis.” E presencia Mericano den region en todo caso a keda mas halto cu normal.