Sindicatonan di Aruba a reuni den un rueda di prensa pa expresa preocupacion riba e asina-yama consensus Rijkswet HOFA. Presidente di FTA, Hose Figaroa, a indica den nomber di e sindicatonan cu ta importante pa bolbe pone e tema den discusion publico, specialmente na un momento cu Aruba ta conmemorando 40 aña di Status Aparte. Segun nan, cualkier decision cu por afecta e autodeterminacion di pueblo di Aruba mester ser analisa cuidadosamente.

E representantenan sindical a indica cu e asunto di e consensus Rijkswet HOFA a ser discuti na diferente momento den pasado, pero cu den ultimo tempo e debate a suavisa un poco, pero segun nan, e momento actual ta apropia pa bolbe trece e tema den discusion amplio.

E sindicatonan a pone enfasis riba e contexto historico den cual e preocupacion aki ta surgi. E aña aki, Aruba ta celebrando 40 aña di Status Aparte y tambe 50 aña di Himno y Bandera nacional. Segun nan, e simbolonan aki ta representa aspiracionnan cu pueblo di Aruba a lucha pa logra durante hopi decada. Status Aparte, alcansa 40 aña pasa, ta un expresion importante di e derecho di autodeterminacion di pueblo di Aruba.

Recientemente gobierno Hulandes a anuncia cu Conseho di Minister di Reino a aproba e concepto di e consensus Rijkswet HOFA. E concepto di ley lo sigui su proceso legislativo na Hulanda, unda e lo ser manda pa Raad van State pa conseho prome cu sigui su trayecto pa aprobacion.

Segun e sindicatonan, e anuncio aki a reactiva preocupacionnan cu anteriormente ya a ser expresa riba e tema. Nan a splica cu na Aruba leynan normalmente ta ser traha y aproba door di Parlamento di Aruba, cu ta representa e pueblo. Un Rijkswet, sinembargo, ta un ley na nivel di Reino cu ta ser trata principalmente den Parlamento Hulandes, loke segun nan kiermen cu e influencia di Parlamento di Aruba riba e proceso legislativo ta limita.

Den e caso di HOFA, e propuesta ta trata di un consensus Rijkswet. E concepto di consenso ta implica cu e paisnan envolvi, den e caso aki Aruba y Hulanda, a yega na un acuerdo pa encamina e proceso di legislacion pa regla e asunto na nivel di Reino. Sinembargo, segun e sindicatonan, e elemento di consenso ta principalmente relevante durante e fase preparatorio di e ley. Unabes cu e legislacion final ta aproba, e ta bira un Rijkswet regular dentro di marco legal di Reino.

Segun e sindicatonan, un punto central den e discusion ta si e acuerdo inicial pa encamina e proceso ta automaticamente obliga Aruba pa sigui tur etapa di e legislacion. E proceso pa e consensus Rijkswet HOFA a ser inicia durante un periodo di gobierno anterior, ora cu un acuerdo a ser firma entre Aruba y Hulanda. Sinembargo, e sindicatonan ta opina cu e hecho cu un acuerdo a ser firma no necesariamente kiermen cu e pais ta mara pa sigui tur fase di e iniciativa, pasobra acuerdonan por ser revisa of ahusta si circunstancianan cambia.

Pa ilustra e punto, Figaroa a referi na sindicato FTA su experiencia durante pandemia di COVID-19. Durante e periodo ey, diferente acuerdo laboral y convenio colectivo tabata vigente cu tin termino specifico pa cumplimento. Sinembargo, debido na e impacto di pandemia riba economia y sociedad, algun di e acuerdonan a ser ahusta pa responde na e circunstancianan extraordinario di e momento.

Den e debate riba HOFA, e sindicatonan tambe a menciona cu desde aña 2015 Aruba a implementa diferente medida pa fortalece disciplina financiero y sostenibilidad di finanzas publico. Segun nan, progreso significativo a ser registra tanto na nivel local como internacional cu indicadornan financiero mustrando cu Aruba ta cumpli cu normanan y ta move den direccion positivo.

E resultado aki, segun e sindicatonan, a ser logra principalmente bao di legislacion local. E marco legal actual, incluyendo e ordenansa financiero relevante, a permiti supervision y control di finanzas publico sin necesidad di un Rijkswet na nivel di Reino.

Segun e sindicatonan, e progreso alcansa ta crea pregunta riba e necesidad di cambia e sistema actual. Si e modelo existente ta produci resultadonan positivo, nan ta considera importante pa analisa cuidadosamente e implicacionnan di move supervision financiero na nivel di Reino Hulandes.

E preocupacion principal segun nan ta relaciona cu e impacto potencial riba e autonomia di Parlamento di Aruba. Un Rijkswet ta implica cu cierto decisionnan lo ser determina dentro di marco legislativo di Reino, cual por limita e espacio di Parlamento di Aruba pa haci ahustenan segun circunstancianan local.

Dentro di e propuesta legislativo tin tambe provisionnan cu permiti un pais sali for di e ley, algo cu ta conoci como “exit-bepaling.” Sinembargo, segun e sindicatonan, e condicionnan pa activa e mecanismo ey ta exigente. Nan ta indica cu e criterionan pa logra salida posiblemente lo resulta dificil pa cumpli na corto, mediano, y hasta largo plaso.

E sindicatonan a enfatisa cu nan posicion no ta contra supervision financiero. Segun nan, supervision a demostra cu e por contribui positivamente na stabilidad di finanzas publico durante ultimo añanan. Sinembargo, nan ta opina cu supervision mester keda dentro di e limitenan di autodeterminacion di pueblo di Aruba.

Segun nan punto di bista, Parlamento di Aruba mester keda cu e autoridad final riba decisionnan nacional. Parlamento ta representante directo di e boluntad di pueblo, cual ta eligi nan representantenan pa tuma decisionnan riba direccion di e pais.

Durante e rueda di prensa e sindicatonan a trece dilanti e punto di argumentonan cu segun nan a ser presenta pa sostene e implementacion di e consensus Rijkswet HOFA. Un di e punto principal ta cu participacion den e marco di e ley por facilita acceso na condicionnan financiero mas faborable, incluyendo posible reduccion di interes riba debe publico y acceso na financiamento den futuro cu termino mas faborable.

Tambe a ser menciona cu implementacion di e ley por contribui pa mantene paz y stabilidad den relacionnan entre e paisnan dentro di Reino Hulandes. Sinembargo, segun e sindicatonan, gran parti di e argumentonan na fabor di e ley ta enfoca riba consideracion financiero.

Segun nan analisis, e cuestion central ta si beneficio financiero potencial por ser considera ekivalente na implicacionnan institucional cu e ley por trece. E sindicatonan a expresa cu den nan opinion e derecho di autodeterminacion di un pueblo ta un principio fundamental cu no mester ser negocia. Segun nan posicion, e principio aki mester keda central den cualkier decision politico cu por afecta e structura di gobernacion di Aruba.