(AFP)—Rusia lo manda muhernan cu no kier tin yiu pa psicologo bao guia di salud nobo cu ta destina pa enfrenta un crisis demografico sistematico.
Caida den tasa di nacemento na Rusia ta keda un di e preocupacionnan principal di presidente Vladimir Putin durante su 25 aña na poder, y mirando cu Moscu a manda shen miles di hoben masculino pa frente di guera na Ucrania den e ultimo cuater aña, e problema a solamente empeora.
Bao e guia nobo di ministerio di Salud pa control di salud reproductivo, dokternan lo puntra muhernan cuanto yiu nan kier tin.
Si e muher contesta cero, “ta recomenda pa manda e pashent pa un consulta cu un psicologo medico cu meta pa forma un actitud positivo pa tin yiu.”
E recomendacionnan a ser aproba fin di februari, pero apenas e siman aki media estatal a cuminsa reporta riba esaki.
Hefe di Kremlin ta presenta e poblacion di Rusia cu ta bahando como un asunto di sobrevivencia nacional — advertiendo na 2024 cu Rusia lo enfrenta “extincion” si no aumenta e tasa di nacemento.
Tasa di nacemento di Rusia actualmente ta rond di 1,4 yiu pa muher — e nivel mas abao den 200 aña — hopimas abao di 2,1 cu demografonan ta bisa ta necesario pa mantene un poblacion stabiel.
Den e ultimo añanan, Moscu a haci regla di aborto mas estricto y a pasa ley pa haci asina yama “propaganda sin yiu” ilegal.
Famianan grandi ta ser presenta como heroenan nacional y ta ricibi varios beneficio financiero y social for di e estado.
