E ley di barconan na Aruba, e asina yama Schepenwet, a mira cambionan recientemente den februari, segun por a mira riba e Gazette official di gobierno. E amiendanan haci ta concentra riba mehora seguridad riba lama y aumenta e responsabilidad cu ta cay riba e dononan di e barco mes.
E introduccion di e ley ta detaya cu e ley di dia 4 di februari 2026 ta haci amienda na Schepenwet en conexion cu e necesidad pa modernisa regulacionnan, imposicion di obligacionnan riba e dononan di barco y e introduccion di un posibilidad di investigacion den caso cu accidente sucede.
E amienda aki ta necesario, segun e notanan di splicacion, pa trece e ley den linea cu e practicanan actual y regulacionnan maritimo na nivel internacional. Tur e cambionan aki ta modernisa e reglanan y ta haci nan hopi mas aplicable dentro di Reino, incluyendo Aruba, Corsou, Sint Maartin y Caribe Hulandes cual mirando cu ta trata di un rijkswet, ta aplica na henter e Reino.
Den un di e amiendanan haci, a actualisa y clarifica e definicionnan y bolbe defini esaki completamente pa trece e terminologia den linea cu practica maritimo moderno. E termino “Eigenaar” awo tin un definicion mas amplio, cual ta cubri no solamente e dono registra sino tambe cualkier persona cu a asumi responsabilidad operacional incluyendo cualkier persona cu a tuma over explotacion for di e dono. E palabra “Officier” ta reemplasa titulonan anterior mas specifico manera stuurman, machinist, radiotelegrafist, etc, cu un solo termino unifica. “Passagier” y “pleziervaartuig” ta defini di manera mas preciso y “Verscheper” ta formalmente agrega como un termino defini.
E rijkswet awo ta cubri tambe di manera mas explicito zeeeschepen cu ta registra Aruba, Corsou y Sint Maarten y loke e ta yama openbare lchamen. Tambe un Algemene Maatregel van rijksbestuur por awo duna exencion na cierto categorianan di barco for di reglanan specifico – of den casonan excepcional – trece barconan manera di guera bao e ley.
Otro cambio cu a trece ta den e capitan su responsabilidadnan prome cu e nabegacion, cual awo ta hopi mas detaya y explicito. E ley ta nombra itemnan specifico cu mester verifica incluyendo ekipo di seguridad y rescate (cu manual), instrumentonan di nagebacion, instalacionnan di radio, sistemanan electrico, data di stabilidad, limite di pasahero, etc.
Un di e artikel nobo cu a agrega ta Artikel 9a, cual ta marca un di esnan mas importante. Dononan di barco, yama Scheepseigenaren den e ley, awo ta legalmente rekeri di garantisa cu suficiente recurso y sosten ta disponible pa e capitan por cumpli cu e rijkswet. Algemene Maatregel van Rijsbestuur por pone reglanan adicional, parcialmente pa implementa tratadonan of decisionnan di organisacionnan concerni. E artikel aki ta directamente implementa standardnan maritimo internacional manera Maritime Labour Convention den e ley di Reino.
Otro articulo nobo ta Artikel 12a. Den e artikel aki, ta stipula cu Hoofd van de Scheepvaartinspectie awo tin e autoridad formal pa investiga incidentenan significante cu ta involucra barconan, cu e meta di siña di eesaki y potencialmente crea regulacionnan di seguridad nobo. Reglanan pa con e investigacionnan aki ta conduci por keda crea via decretonan real.
A stipula tambe reglanan tocante e detencion di barconan cu no ta den cumplimento, y esakinan ta significantemente expandi y clarifica. Ambtenaarnan di Scheepvaatinspectie por detene un barco si e tin falta di certificadonan valido, no ta pasa inspeccion of si e dono, capitan of tripulacion rechasa coopera. Segun e ley, esnan yama “Bemanningsleden” awo tin e derecho explicito di contacta hefe di inspeccion di barco si nan tin algun duda.
Segun e ley, e barconan cu detene mester ta na un localidad designa di acuerdo cu e maneho di waf y no por move esaki sini permiso. E oficialnan di douane ta prohibi di permiti, of ‘clear’, un barco deteni su salida. Ademas, mester notifica e administracion di e pais concerni tocante cualkier detencion.
E ley ta introduci tambe un sistema di boet nobo, specificamente contra dononan di barco cu ta den violacion di e obligacionnan stipula den Artikel 9a of otro prohibicionnan. E categoria di e boet ta depende si e violacion tabata intencion (opzettelijk – di 4 categoria) of no (tercer categoria).
Varios titulo mas bieu, specifico pa e tripulacion cual e ley ta nombra como stuurman, machinist, radiotelegrafist, radiotelefonist, etc, a keda reemplasa cu e termino di “officier” den e rijkswet. A kita tambe e referencianan na metodonan di comunicacion anticua manera telegraaf of telefax.
Un cambio chikito pero notable ta e palabra “uitsluitend”,a keda ahusta den e definicion di e uso comercial versus no comercial di barconan, ampliando un poco cua barconan ta cualifica bao e acta aki.
E ley no tin un fecha stipula cu e lo drenta na vigor, e lo drenta den efecto ora cu koninklijk rijksbesluit dicidi y diferente provisionnan por drenta na vigor na diferente momentonan y potencialmente cu diferencia pa cada pais dentro di Reino.
Esaki ta marca un esfuerso di modernisacion y e introduccion formal di responsabilidad na e dononan y autoridad pa investigacion di accidentenan, cual ta marca e elementonan di mas impacto pa seguridad maritimo den henter Reino.
Anteriormente den Bon Dia Aruba nos a papia tocante e casonan cu Directie Scheepvaart di Aruba ta encontra, unda hopi biaha tin un falta di cumplimento cu e rekisitonan mas basico cu ta trata seguridad, y e ley aki su cambionan awo ta stipula di manera mas directo e responsabilidad cu ta den man di cada dono di barco y e trabao di inspeccion cu nan tin cu haci prome cu nabegacion ademas di implementa medidanan pa sigura un cumplimento di esaki, cu consecuencia presente.
